Galeria VZ

Doben.... foti matan hateke took ba lalehan Lalehan kalan ne'e malahuk Laiha fitun... laiha fulan Nakukun hafalun fuan Be taridu tan saudades naresin ba o Karik o mos sente nune'e?   Doben... tuur fatin ne'e mamuk iha hau sorin Hein o nia lalatak atu hakonu Hamutuk ita sei hasoru malirin anin kalan    Ita sei haktuir fali  Sentimentu hirak be ladauk kotu Ita sei hasasin fali  Oinsa taridu saudades ne'e doko ita Ita sei unifika ita fuan nia nakdedar I Iha hakuak ida metin tebes Ita sei fahe kmanek hamutuk kalan ne'e  Iha rein ida midar tebes O no hau, hamutuk ita sei hafalun ita klamar ho manas ne'e O no hau, hamutuk ita sei hateke lalehan kalan be malahuk ne'e Maibe... Oinsa sira ne'e bele mosu se o rasik la mosu mai?   Doben... lalelan kalan ida ne'e malahuk Nune'e mos ho hau nia fuan  LPS, 3 Janeiro 2017 VZ

1. Tanba saida maka ita hakerek obra literariu? Saida maka motiva alin sira hakerek? Ha’u hakerek tanba hetan inspirasaun husi livru istoria sira ne’ebe ha’u lee desde sei kiik no halo ha’u admira oinsa mak istoria ne’ebe ema hakerek iha livru laran ne’e bele sai hanesan mundu ida ne’ebe furak no halo ita mout iha laran wainhira lee.   Ho ida ne’e ha’u hare’e obra literariu hanesan ‘espelhu májiku/cermin ajaib’ ne’ebe bele halo ita hetan istoria konaba pasadu, prezente nomos futuru tan istoria sira ne’ebe autor sira ka ita hakerek. 2. Desde horibainhira maka ita hahu hakerek? Hahu hakerek ho lian saida? Tanba sa maka uza lian sira ne’e? Ha’u foin hakerek wainhira sei eskola iha universidade. Ha’u hakerek ho lian Tetum tan hau hakarak atu senti sabor Tetum nudar lian ofisial iha istoria ne’ebe hau hakerek. Maski nune’e ikus ne’e ha’u mos koko atu hakerek ho lian ne’ebe hau sei hatene hanesan Indonezia, Ingles no Portugues maibe Tetum sei sai nafatin prioridade. Ha’u