Galeria VZ

  Ha’u nia aman dehan nia la gosta Portugal Maibé nia sempre gosta haree Portugal joga tebebola Maski nune’e, nia sei la hakilar ‘Portugal!’ Ho lian makaas hanesan adeptu sira seluk Wainhira ekipa Portugal hatama golu   Wainhira Timor seidauk ukun an Ha’u rona liu de’it kona-bá Portugal Ha’u aprende Portugues neneik husi manorin Portugeza no Timoroan Maski to’o agora ha’u seidauk ba Portugal Ha’u mos nunka akompanha Portugal joga iha Eurocopa  hanesan vizinhu sira Maski ha’u akompanha bebeik Oinsa vizinhu sira ne’e hakilar ‘Portugal!’ Wainhira Portugal manan jogu ida  iha Eurocopa   Ha’u hanoin fali iha fulan ne’e Tinan sanulu resin liubá Ó hateten mai ha’u ‘Ha’u la gosta Portugal’ Wainhira Portugal manan jogu ida Iha Eurocopa tinan ne’ebá Ha’u kaan atu hatene Oras ne’e karik ó sei nafatin Hateten liafuan hanesan?   Iha lian nakrotok ema sira be hakilar ‘Portugal’ Iha Eurocopa Ha’u buka fali ó.

  Nia be hakarak hein iha domin Nia be ema hein folin domin Hein mak domin Ha'u nia ego la simu Wainhira o lakohi simu Ha'u noin ho neon koko atu simu Se iha o noin duun ha'u laiha noin karik o seidauk tetu o noin   Tempu mak ne'e ona Ita hamutuk ona aban karik lae ona  Dili, 17 Maio 2021

Dadeer tuku hitu, iha kios ropa ida iha merkadu Lospalos, jaket marka Jeep tahan rua koor metan no xokolate   tara ona tuituir malu hamutuk ho ropa sira seluk iha uma tatiis. Tiu Bano, nain ba kios-ropa ne'e dasa hela kios laran hodi hateke lesuk ba liur ba jaket rua be tara hela. Dasa hotu rai mak Tiu Bano foin bele han ninia matabisu dadeer. Xá manas kopu ida nia halo rasik ho bee nono husi buli-eletriku. Xá ne’e akompanha ho dosi molen fuan haat iha bikan kiik ida. Dosi molen ne'e nia sosa husi maluk vizinhu negosiante ida iha ninia kios sorin. Han dadauk, tiu Bano nia matan atensaun nafatin ba ropa sira ne’ebé nia faan iha kios tatiis no kios laran. Mane klosan ida lao tama mai hodi hateke hetan jaket Jeep metan no mutin be tara hela. Nia hateke ba mai buka kios nain. Tiu Bano hare'e hetan mane-klosan ne'e, para kedas nia matabisu, hamriik lao hasoru nia kliente dahuluk ba dadeer ida ne'e ho oin midar. 'Bondia tiu, jaket ne'e hira?' Mane

    “Tiu António, bele tula lai ha’u ba haree Kapela Suai ka? Husi ne’e dook ka besik?” Ha’u husu ho oin la hakmatek. Ókulu metan proteje netik ha’u-nia matan husi loron manas tuku sanulu dadeer iha Suai.   “Ah, kapela ka mana? Bele. Besik hela sah,” nia hatan no ami mos sai dadaun ona husi aeroportu Suai be foun hela ne’e.   Sai husi aeroportu Suai, ha’u admira tebes Suai nia estrada sidade laran be mesak tetuk no luan. Viajen ho kareta tuan ne’e sente hanesan fali sa’e hela aviaun be semo hela iha kalohan leten. Husi dook ha’u hateke hetan foho Taroman iha parte osidental hamriik furak ho nia kor azul iha ninia orizonte. Husi estrada sorisorin, populasaun nia uma forma tuituir malu. Barak liu uma bloku be foin halo hela maibé uma tuan sira mos mantein hela ninia kor be tuan ona. Iha uma talin tradisional balun típiku Suai nian ho ‘leni’ tara hela iha nia oin ho amostra oioin.   Loja xineza ‘zhing zhang’ baratu sira mos loke hela hodi parlenta sasán be habosok matan ho kor o