Viajen Serbisu ba Betano (Istoria badak)

“Halo nusa? Aban imi atu ba tan Betano?” 

Ana, ha’u-nia feen husu ha’u ho hateke kroat husi espelhu kuadradu be tara iha didin-lolon. Nia foin hariis no troka hotu ona wainhira ha’u tama mai kuartu laran no fó hatene nia kona-bá ha’u-nia viajen ne’e. 

“Tansá mak ó mak tenki ba Aló? Funsionáriu seluk laiha ka?” Aná  hateten hodi nafatin hateke espelhu no sui nia fuuk be bokon. “Be laós ha’u mak bá entaun sé mak atu bá? Ema laiha hotu ne’e?” Ana hateke ha’u dada iis todan. 

“Se ema laiha entaun hateten ba imi-nia xefi lalika ba tiha de’it. Kansela tiha atividade. Oras moras COVID la’o hela hanesan ne’e mak imi ba mai diak hela?” 

“Eipah, Ana, dala hira ona ha’u dehan, ami ne’e laós hanesan imi serbisu iha NGO internasional be fasilidade kompletu imi serbisu husi uma. Oli-foer ne’e ema laiha atu tula, kompanhia be tula ne’e kontratu hotu ona seidauk renova. Governu be runguranga. Iha ha’u-nia serbisu fatin só ha’u deit mak toma konta tula buat ne’e. Agora ó koalia netik hanesan ne’e se mak atu ba tula?”

“Hei, ha’u preokupa mak ha’u husu ne’e. Imi-nia xefi sira hatene hela dehan oras hanesan ne’e tenki hakmatek iha uma? Agora imi la’o nafatin. Se mak hatene dehan imi la’o hanesan ne’e ho ema ruma, ema ne’e keta hetan ona COVID karik halo oinsá? Imi nia xefi sira la hanoin to'o iha ne'eba mak haruka imi la'o nafatin ka?”

“Heh, laiha ida!! Ó keta halo tauk ita bá be diak, ó hakarak ka lakohi aban ha’u tenki ba. Ne’e ha’u-nia serbisu duni.” Ha’u dada iis todan, Ana mos dada iis todan. Nudar surik, ami-nia iis ida-idak hakanek ona ami ida-idak nia fuan ho ki’i. 

“Ha’u la bandu ó atu labele ba Aló. Ha’u preokupa ho imi la’o fali ho situasaun moras COVID be la’o hela. Suspeitu be atus ida resin ona. Kazu pozitivu be amenta tan,” Ana hateten ho lian tuun no nia tuur dadaun iha kama ninin. 

“Ó kalma uituan be diak. Ita-nia fiar ho lulik sei satan ita sah. Ha’u mos ba lori ho luvas ho masker no dezinfekta kompletu. Diak hela sah,” ha’u mos lian tuun hodi hola fatin tuur iha Ana nia sorin. 

Ana hateke kroat tan mai ha’u. Ne’e tamba dezinfekta ne’e momentu nia mak sosa netik mai ha'u no nia hirus loos ha’u-nia eskritóriu la prepara ekipamentu protesaun sira ba COVID nian. Ha’u mos satiadu maibe atu halo oinsá, ha’u hato’o ona ba xefi sira maibe sira dehan orsamentu ba ida-ne’e laiha. Karailu tan ho sira pah!!!

“Depois aban bá, imi atu toba iha ne’ebé?” Ana hatene katak ha’u sei hela loron rua iha ne’ebá.

“Ami ba toba iha eskritoriu iha munisipiu ka, atu ba toba iha ne’ebé fali?” 

“OK. Loos ona. Haree ba sosa sasan-hamoos nian lori ho par hamoos tiha lai fatin mak imi hodi toba. Sosa ho sabaun fase liman lori ho. Haree lalika empresta ema nia sasán. Lalika ba ema nia uma. Lalika simu sasan husi ema. Haree sosa ho paun natoon ba loron rua hodi aguenta. Dalaruma restaurante sira taka hotu mak ne'e. Iha ne'eba, se bele tein rasik de’it,” Ana kontinua no ha’u senti ha’u-nia tilun manas. Ha’u mak atu ba Betano maibé Ana mak hanesan to’o uluk tiha ona iha ne’ebá.

“Alo? Rona ha’u koalia ka lae?” Ha’u hakfodak husi ha’u-nia hanoin. “Heisah, ha’u rona.” Ana mos hamriik hodi la’o ba liur. Ha’u dada iis kmaan. 

Finalmente, haksesuk malu ne’e rohan duni. Ana kuandu preokupa, nia koalia liufali ha’u-nia inan no ninia liamenon sira kona-bá COVID hanesan forte liufali pessoal saúde sira nia sosializasaun iha televizaun. 

Iha loron tuir mai, ha’u aranka duni ba Same atu depois sei ba Betano. Ho Ana ninia preparasaun maximu, oras ne’e ha’u lori tuir paun plastik mean boot ida natoon ba loron rua,  manteiga blue band tomak ida, no bolaixa ho sabor nuu no fore-sona. Lae karik nia hakarak atu tein etu tau iha kontentor-kiik atu ha’u lori tan maibé ha’u mak dehan lalika. Ha’u senti hanesan fali labarik TK atu ba eskola be nia inan prepara buat barak nia atu lori.

Tuir dalan ha’u han fore-sona no fahe ba tiu Ameu, kondutor ne’ebé akompanha ha’u. Ami rua uza hotu luvas no taka ibun ho masker. Tiu Ameu lori ho sabaun-been fase liman nian.  Ho ibun taka ho masker ami konta istoria no dalaruma ami hamnasa tiha tamba konta istoria komik. 

To’o iha kruzamentu iha Maubisse, ha’u hein loos atu ami rua bele tuun hodi han meudia ka sosa de’it hahan hodi lori maibé restorante iha kruzamentu ne’e taka hela. Ami ba liu fali iha sorin liu maibé ne’e mos taka. Oras be tuku sanulu resin rua liutan ona no ami rua tiu Ameu be hamlaha ona sá tan anin malirin iklima Maubisse nian halo ami malirin no kabun be bubu sente hamlaha liutan. Wainhira ami atu besik tama iha area Fleixa nian, derepente ha’u sente hanesan haree Ana nia lalatak hamriik iha estrada ninin hodi lulun liman rua iha hirus matan forma letra X no hakilar loos mai ha’u hodi hateten 'ha’u dehan ona restorante sei taka. Lakohi rona ha’u agora haree too?'

Ha’u haruka tiu Ameu para no ami rua deskansa iha Fleixa hodi hola anin. Ha’u tenki hasai paun ho manteiga hodi fahe ba tiu Ameu no ami rua han akompanha ho deit bee. Ha’u mak akompanha ho kafé manas tamba ha’u rai kafe ne’e iha termu kiikoan portável ne’ebé bele lori ba mai ho kmaan. Kafé ne’e ha’u rasik mak halo tan Ana la hatene ha’u-nia kafe nia sasukat favoritu no ha’u mos la obriga nia tenki hatene halo kafe mai ha’u. Han tiha paun ho manteiga, ha’u senti Ana nia lalatak mai tuur besik no hateke ha’u ho hamnasa goza nian. Nia bonita loos kuandu hamnasa.

Han hotu, ha’u ho tiu Ameu kontinua viajen no ami to’o iha Same iha tuku tolu loraik. Ba iha ne’ebá mos ami hanoin restorante loke maibé afinal ami ba hare’e taka hotu ona. Ami deside ba fali eskritóriu iha munisipiu nomos atu ba haree hotel balun atu buka fatin toba. Hotel sira taka hotu no deside la simu bainaka tamba estadu emerjensia. 

Ha’u husu tiu Ameu tula ha’u ba ihaeskritóriu munisipiu. To’o iha ne’ebá, ami telfone kolega Pancracio, responsavel ba eskritóriu ne’e. Horseik ha’u telfone la tama. Nia simu tiha telfone mak nia hateten katak nia afinal ba tiha ona Alas no xavi nia lori hotu. Iha Same nia mesak mak pontu fokal  nomos taumatan ba eskrióriu. 

“Aipah Pancracio ne’e halo mate ita de’it pah. Ha’u hatene hanesan ne’e horseik ha’u halo razaun ita lalika mai pah,” ha’u murmura la kontente tebes. 

“Aló, ó ba uma de’it ona,” tiu Ameu sujere. Nia iha familia iha Same Villa ne’e. Ha’u tetu ninia sujestaun. Maibé Ana nia lalatak hanesan mosu tan mai hodi hateten 'ha’u dehan ona, la ba ema nia uma mak ne’e. Ema husi saúde dehan bebeik agora la ba nia uma arbiru mak ne’e.'

“Aipah, tiu, agora oinsá la’os ha’u lakohi atu bá maibe situasaun hanesan ne’e ne’e?”

“Aló mai ona sah, ha’u-nia familia ne’e diak hela sah. Orsida ba ita toba kuartu ketak-ketak. Sobrinha sira ne’e iha ne’e de’it, sira la ba railiur ida. Diak hela sah. Lae ohin kalan ó atu toba iha ne’ebé?”

Tetu ba mai ladiak ikus mai ha’u uir deit ona tiu Ameu hodi bele hetan fatin toba ba kalan ida nian. Bainrua ami fila ona. 

Kalan ne’e Ana telfone tan husu ha’u toba iha ne’ebé no tein ona saida. Atu la halo nia siak tan husi telfone, ha’u bosok tiha nia katak ha’u toba iha eskritóriu no tein hela supermie hodi han akompanha ho paun. Ana hanesan ladun fiar tamba nia rona lian nakrotok maibé ha’u dehan ne’e vizinhu sira be besik. Kalan ne’e tiu Ameu nia familia tein koto ba modo kalan no ha’u han ho gostu. 

Loron tuir mai, ha’u kontinua ho serbisu tula oli-foer iha sentru eletrisidade Betano no fila kedas iha loron hanesan. Ha’u to’o kalan iha uma no hariis kedas. Wainhira han kalan ha’u konta ba Ana katak nia predisaun kona-bá restorante taka ne’e loos duni. Maski nune’e ha’u nafatin lakohi konta katak ha’u toba iha ema nia uma. Ha’u kolen husi viajen no konta sai ida ne’e ne’e halo Ana hirus no ami rua sei haksesuk malu to’o kalan boot tamba Ana la gosta kuandu ha’u la halo tuir ninia sujestaun sira. 

Liu tiha semana ida...

Loron ne’e ha’u foin hariis hotu no tama ba kuartu laran. Ana hateke ha’u ho oin tensaun husi espelhu. Nia kaer hela ha’u-nia telfone. 

“Ema husi Ministériu Saúde mak telfone mai Aló,” ha’u hakfodak tiha ho oin fila. Sorte toalha be ha’u kabala metin ne’e la monu. “Ministériu Saúde?”

“Sim,” Ana hateten no entrega telfone mai ha’u. Ha’u simu telfone ho fuan tuku-tuku.

Ana hamriik hodi la’o sai dadaun maibé nia hamriik tiha de'it iha odamatan no hateke tuir ha’u ho oin preokupa tebetebes. 

Simu tiha telfone, ha’u mos troka kedas no kalan ne’e ha’u la toba iha uma maibé toba fali iha hotel ida iha Dili ne’ebé durante ne'e ha’u nunka mehi atu toba bá. Ana telfone ha’u no mensajen ha’u husi Whatssapp nomos Messenger. Nia dehan labele tauk liu. Buat hotu sei diak. Halo tuir pessoal saude sira hateten. Labele naran liga ka besik ema arbisu. Hakmatek iha kuartu. Ha'u lee duni mensajen hirak ne'e maibe ha’u lakohi atu hataan. 

Kalan ne'e, maski  ha'u toba iha kama ida ho esponza be mamar no kolxa ho sumasu ne'ebe morin, ha’u hanoin kona fali Ana iha uma no ninia liafuan sira. Ninia preokupasaun sira. Ninia predisaun sira. Ninia hirus. Oinsá nia gosta haksesuk malu ho ha’u no ha’u nunka manan nia argumentu sira no sei taka de’it ho lian aas. No ikus, ami rua sei nonook no koko hadame malun fali wainhira oras toba to'o no ahi hamate ona. Ohin kalan buat sira ne’e laiha ona. No ha’u saudades fali. 

Iha kalan boot, ha’u la aguenta. Ha’u hatan ba ninia mensajen ida iha Whatssap ho emoticon tanis dala barak. 

Dili, 15 Abril 2020