Domin no Diferensa

Wainhira sei eskola, ha’u iha belun mane no feto ida ne’ebe laran monu ba malu no hahu sira nia relasaun domin iha tinan dahuluk eskola nian. Maski  nune’e, sira nia relasaun  hasoru diferensa iha ida-idak nia tinan, hahalok no hanoin hodi halo sira dalaruma hirus malu no kuaze atu fahe malu. Belun feto ne’e dalaruma senti laran nakraik nune’e iha tempu ruma nia fahe nia sentimentu ba ha’u nomos belun feto maluk seluk ne’ebe nia konfia atu hato’o nia problema. 

Iha kalan ida, ha’u mehi  konaba nia no nia doben. Iha loron tuir mai, ha’u hasoru belun feto ne’e, ha’u haree katak nia la duun kontente tan ninia problema no sintimentu sira. 

Ha’u konta tuir ba nia oinsa ha’u mehi haree nia no nia doben hirus malu makaas to

’o nia tanis senti la bele hodi sai konfuzaun lahatene atu halo oinsa loos. Iha mehi ha’u hakbesik nia hodi dehan: ‘’Belun, iha mundu ne’e, laiha mane ne’ebe perfeitu maibe sei iha domin ne’ebe perfeitu….”.

Ha’u ho ha’u nia belun sai bilaan ba momentu balun ho ha’u nia mehi no  liafuan ida ne’e. Lahatene loos tansa ha’u bele mehi nune’e? Karik tanba ha’u preokupa ho nia maibe ha’u rasik la hanoin hetan oinsa ha’u bele hetan liafuan furak ida ne’e.

Liu tiha ida ne’e, ha’u haree katak dalaruma akontense nafatin konflitu kiik oan entre sira nain rua maibe sira nain rua kontinua nafatin sira nia domin to’o tinan ikus eskola nian. Tinan hirak liuba, ha’u  haree sira nain rua kaben duni ona no iha ona oan balun. Ha’u kontente ho sira nain rua no hein katak sira bele mantein nafatin sira nia domin to’o rohan. 

Belun sira, karik ne’e laos istoria ne’ebe estraordianariu liu maibe buat ne’ebe sei book ha’u nia fuan konaba sira nain rua mak liafuan ne’ebe ha’u koalia iha ha’u nia mehi ba sira: IHA MUNDU NE’E LAIHA MANE NE’EBE PERFEITU MAIBE SEI IHA DOMIN NE’EBE PERFEITU…

Karik liafuan ne’e sei la book deit ha’u nia fuan maibe mos book nafatin sira nia fuan iha tempu ne’ebe difisil nomos karik bele book belun sira nia fuan fuan ne’ebe lee istoria ida ne’e.

Kmanek no Aifunan Nakonu….