Batar Da’an no Saudades Uma…





Ha’ u tau istoria ida ne’e tan hanoin hetan fali belun ida nia esperensia konaba nia moris iha  nia viajen buka matenek nian. 

Ha’u nia belun ne’e mai husi fatin ida ne’ebe iha rai bokur no matak. Nia inan-aman serbisu nudar agrikultor hodi halo toos no natar. Iha tempu bailoron, hafoin fila husi eskola nia no nia alin sira ajuda sira nia inan-aman hodi hamoos to’os prepara ba tempu kuda batar. Wainhira to’o tempu udan, sira ba hamutuk fali hodi kuda batar no dalaruma sira lori hahan husi uma hodi han hamutuk  hafoin serbisu iha to’os ne’e. 

Tama eskola sekundaria, tan hahu hetan belun barak ne’ebe balun moris diak uituan, nia hahu senti katak la duun furak ona ba nia atu halo serbisu iha to’os no nia hahu hakarak atu sai hanesan nia kolega sira seluk hodi la’o pasiar, ransu no hasoru malu hodi konta istoria.  

Iha meudia ida wainhira fila husi eskola, to’o iha uma, nia hamlaha teb-tebes. Wainhira haree ba hahan iha meza leten nia hetan deit batar daan iha ne’eba. Nia senti baruk ona tan horseik mos sira han ona batar daan. Nune’e nia lakohi han hodi ba toba tiha. 

 Iha kalan wainhira haree tan batar daan nudar hahan kalan nian, nia hirus tan dala ida hodi lakohi han. Nia mama fo hatene nia katak sira nia foos hotu ona maibe nia lakohi rona no hirus nafatin tan hanoin hetan nia kolega balun gosta hamnasa ema ne’ebe baibain han batar daan bebeik iha uma. Husi ne’e, nia hahu hanoin atu bele hetan moris diak iha futuru. 

Remata eskola sekundaria, nia hetan bolsu estudu hodi eskola iha rai liur. Fofoun, nia haksolok tiha ho ambiente foun ne’ebe modernu, iha buat oioin no la hanesan iha ninia rai ne’ebe izoladu. Maibe liu tiha fulan balun nia hahu hanoin nia uma no familia sira. 

Loron ida wainhira nia fila husi eskola, nia sosa hahan iha restorante diak ida tan iha dadeer nia la biban atu  tein. Wianhira han hela, derepente udan tau no nia hahu hanoin hetan fali oinsa iha momentu hanesan ne’e nia no nia familia sira hamutuk iha toos hodi kuda batar no nia alin sira halimar iha to’os laran. Nia hahu hanoin hetan fali batar daan ne’ebe nia mama halo no sira han hamutuk iha to’os. Derepente nia para han no hahu tanis hanoin nia familia no siik oras ne’e sira han hela saida loos. Nia atu telfone sira maibe nia pulsa hotu ona tan nia osan mos seidauk haruka mai. Nia laran susar loos hodi hahu tanis mesa-mesak iha loraik ne’e. 

Liu tiha loron balun wainhira nia osan iha fali  ona, nia sosa pulsa hodi telfone nia inan no husu oinsa atu tein batar daan. Tuir mai, nia desidi ba merkadu atu sosa batar no ingrediente seluk atu tein batar daan. Husi loron ne’e wainhira nia senti saudades tebes ba nia familia nia sei tein batar daan hodi han atu hanoin fali sira.

Komentar

Posting Komentar

Postingan populer dari blog ini

Aprende husi Sócrates: Ta’es Dala Tolu

Gambar
Sócrates mak ema matenek-nain ida husi Igregu. Nia ema ida be naran boot tamba ninia kuinesementu no sabedoria ne’ebe klean.  Loron ida, iha mane ida mai hasoru malu ho Sócrates no hateten,  “Itaboot hakarak hatene saida mak ha’u foin rona konaba itaboot nia belun ida?’’ “Hein lai,” Sócrates hatán.   “Molok itaboot fo hatene ha’u konaba buat ruma, ha’u hakarak itaboot passa lai ezame kiikoan ida. Ezame ne’e hanaran Ta'es Dala Tolu. ” “Taes Dala Tolu?” Mane ne’e husu. “Loos,” Sócrates hatán.  “Molok itaboot hateten mai ha'u konaba ha’u nia belun, karik diak liu fó tempu uituan hodi ta’es lai buat ne’ebé itaboot atu hateten. Ida ne’e ha’u bolu dehan ezame ta’es dala tolu. Ta’es dahuluk nian mak LIALOOS . Itaboot garante ona katak buat ne’ebe itaboot atu hateten mai ha’u ne’e loos?" “Lae” mane ne’e hatán, “loloos ne’e ha’u foin mak rona no hakarak atu fo hatene ba ita.” “Diak,” Sócrates hatan.  “Se nune’e
Baca selengkapnya

Domin no Diferensa

Gambar
Wainhira sei eskola, ha’u iha belun mane no feto ida ne’ebe laran monu ba malu no hahu sira nia relasaun domin iha tinan dahuluk eskola nian. Maski   nune’e, sira nia relasaun   hasoru diferensa iha ida-idak nia tinan, hahalok no hanoin hodi halo sira dalaruma hirus malu no kuaze atu fahe malu. Belun feto ne’e dalaruma senti laran nakraik nune’e iha tempu ruma nia fahe nia sentimentu ba ha’u nomos belun feto maluk seluk ne’ebe nia konfia atu hato’o nia problema.  Iha kalan ida, ha’u mehi   konaba nia no nia doben. Iha loron tuir mai, ha’u hasoru belun feto ne’e, ha’u haree katak nia la duun kontente tan ninia problema no sintimentu sira.  Ha’u konta tuir ba nia oinsa ha’u mehi haree nia no nia doben hirus malu makaas to ’o nia tanis senti la bele hodi sai konfuzaun lahatene atu halo oinsa loos. Iha mehi ha’u hakbesik nia hodi dehan: ‘’Belun, iha mundu ne’e, laiha mane ne’ebe perfeitu maibe sei iha domin ne’ebe perfeitu….”. Ha’u ho ha’u nia belun sai bilaan ba momentu
Baca selengkapnya

Feto no Lideransa: Wainhira Feto Ida Sai Lider

Gambar
“As women, we must stand up for ourselves. We must stand up for each other. We must stand up for justice for all.” – Michelle Obama Sa mak ita no  ema barak hanoin kona wainhira rona no hare'e feto ida sai lider ka ema-boot? Konserteza sei iha responde no komentariu oioin ba hahusuk ida ne'e. Desde tempu antigu to'o tempu modernu ohin loron nian, iha ona figura lideransa feto barak ne'ebe naran boot iha mundu hanesan Cleopatra, Hatsheptshut, Rainha Elizabeth, Benazir Butho, Angela Merkel, Margaret Tatcher, Indira Gandhi, Gloria Macapagal Arroyo no sira seluk tan ne'ebe marka ona sira nia an ba mundu katak feto iha kapasidade atu kaer lideransa ida. Lideransa iha kontestu ida ne'e refere ba area oioin hanesan politika, sosial, relijiaun, negosiu no selu-seluk tan. Koalia konaba lideransa, iha stigma jeral ida husi sosiedade hodi hanoin katak so mane de'it mak bele kaer lideransa. Stetmentu afirmativa ida ne'e afinal sai ona fallasia (hanoin la-lo
Baca selengkapnya