Aifunan Daruak (Parte 1)

PARTE I

Autor: VZ

Oras hatudu ona besik tuku sanulu resin rua wainhira Liria remata hakerek karta elektroniku ka email ba nia xefi husi komputador marka Dell iha nia meza serbisu fatin.

"Yap! Finalmente, konsege haruka duni!"

Ho haksolok Liria lamas nia pasta no xavi odamatan eskritoriu nian hodi hakat sai lalais ba sala vizita no tau nia liman fuan boot iha ekraan kiikoan makina verifikador oras nian. Liu minutu  ida de'it, liafuan thank you mosu husi makina nia laran hodi hatudu katak Liria nia oras sai grava ona iha makina ne'e nia laran.

Nu'udar funsionariu ne'ebe sai ikus, Liria tenki xavi odamatan. Hafoin nia hakat hodi la'o lalais ba to'o iha portaun boot hodi bele hein kareta iha estrada  boot. Taxi mamuk ida mai kedas hodi para iha nia oin no Liria sa'e kedas taxi ne'e hodi fo ordem ba sofer atu ba restorante ida iha Lecidere.

"Agora, ha'e bele ba han meudia...".

Tuir dalan telfone lian no Liria hatan kedas.

"Halo Tina, ha'u tuir dalan ona favor hein lai uituan tan de'it...."

Ligasaun kotu no Liria ansi sofer atu ba lalais nia fatin destinasaun.

Liu minutu sanulu deit, Liria tuur ona ho Tina iha restorante Sabor Kmanek. Tina doko ulun de'it hare'e Liria ne'ebe mai tarde maibe nia fo hamnasa midar nu'udar bemvindu ba nia kolega tuan desde sekundaria ne'e.

"Tina doben, deskulpa ha'u mai tarde. Ha'u tenki remata serbisu urjenti  ida husi xefi ne'e mak ha'u foin to'o  ne'e."

"Li, diak hela. Importante o la haluha atu mai, tan o rasik mak konvida atu selu ha'u han iha fatin ne'e hodi selebra o nia serbisu foun iha kompanhia internasional publikasaun hanesan AFP. Parabeens miga' 

Tina hamriik hodi hakuak nia kolega diak ne'e.

"Tina, obrigada barak. Ok, ita hahu hili menu ona tan ha'u fiar ita rua nia kabun  hamlaha loos ona".
Sira hili menu favoritu ida-idak nian. Hein  dadauk hahan mai serbi iha meza, sira aproveita tempu hodi  konta ida-idak nia istoria foun iha serbisu fatin.

Liu minutu sanulu, servente lori hahan mai no tau ba sira nain-rua iha meza ho kuidadu. Sira hili menu hahan xineza hanesan etu, naan manu-rade no modo chap cay no hemu ho xa jeladu. 

"Li, hatene ka lae? Frans mai fali tiha ona."

Derepente Liria senti hahan hisik iha nia kakorok laran no nia mos mear kedas hodi susar atu tolan hahan.

Tina hamnasa hodi oferese kedas xa iha kopu  ba Liria hodi hemu kedas. Hafoin minutu balun, Liria senti livre ona husi hisik iha kakorok ne'e.

"Tina... tansa o tenki fo hatene ida ne'e mai ha'u? O  hatene ami nain-rua nia relasaun ne'e oinsa. Lalika kehe fali ahi-matan ne'ebe  mohu kleur ona..."

Liria kontinua atu han maibe nia suru halimar de'it hahan hodi hateke metin ba bikan laran ho seriu.

"OMG, Liria.... deskulpa doben. Ha'u laiha intensaun atu provoka o. Favor perdua ha'u sah. Ha'u hatene imi rua laiha ona relasaun espesial,  maibe ha'u hanoin la sala se ha'u fo hatene katak nia mosu fali ona iha ne'e hafoin tinan neen nia ba eskola hodi duni titulu majistradu iha rai liur  ne'eba."

"Tina, ha'u komprende o nia intensaun maibe ha'u tenki dehan ba o,  ohin ne'e ha'u la hein atu rona notisia ne'e. Ha'u passa ona  tempu difisil durante tinan ne'en atu aprende simu realidade konaba nia. Favor keta halo ha'u atu repete fali faze ida ne'e. Ne'e laos buat fasil Tina..."

"OK, deskulpa dala ida tan. Maibe ha'u hare'e rona nia naran halo o hisik kedas mak ne'e... keta halo o nia fuan mos sei hisik ba nia. Hehehehe"

"Tina.... ha'u dehan bebeik ona sah. Keta goza bebeik ha'u be diak. Orsida ha'u la han kedas mak ne'e..!"

Tina hamnasa goza Liria ne'ebe hatudu oin boot maibe hafoin sira hamnasa hamutuk fila-fali to'o remata sira nia hahan no despede malu hodi fila ba ida-idak nia serbisu fatin.

Loraik ne'e sai nu'udar loraik ne'ebe estranu ba Liria. Derepente nia sente sentimentu kahur malu entre kontente no tristi kili halimar nia neon.

(Kontinua...)