Ha’u Hanoin....Afinal (Parte 1)


Fonte: Google pics
Autor: VZ

Moris hanesan aventura foun ida ba Lina wainhira nia muda ba sidade kapital hodi hahu nia estudu iha universidade.
Iha kalan ida, misscall ida husi mane ne'ebe deskuinesidu hahu bo'ok Lina nia moris ne'ebe la'o normal sai kores oioin. Ikus mai  ligasaun intensivu husi telfone ne'e halo Lina senti katak nia iha sentimentu diferente ba mane deskuinesidu ne'e, ne'ebe ikus mai hatudu an ho naran Gil . Nune'e relasaun ne'ebe hahu husi misscall ne'e kontinua nafatin hafurak Lina nia moris to'o tempu ida wainhira Lina deskobre Gil nia objektivu loloos.

Parte 1
Misscall Misteriozu

"Ha'u nia hakmatek laos ona hakmatek
Hafoin o book ha'u husi sikun ne'ebe ha'u nunka hare'e hetan"


Ha’u ‘enjoy’ hela rona musika husi Mp3 player wainhira ha’u  rona  ha’u nia  telemóvel NOKIA C3 lian hela hodi hatudu misscal husi númeru foun ida ho numeru  7791876.
  
'Se mak ida ne’e? Karik ema bulak ruma ne’ebe finji misscal deit!'
Latan tiha iha kama leten, ha’u hanoin hikas fali oinsa fofoun muda mai iha sidade ida ne’e nudar estudante oan no la’o rai ida. Ho ambiente ida- ne’ebe oinseluk tebes kompara ho wainhira ha’u sei hela ho inan-aman,  buat hotu kompletu no la susar ba buat hotu,  maski susar tebes atu sai ba pasiar.

Maibe ohin, moris nudar estudante oan iha uma aluga (kos) livre atu deside bainhira mak hán, bá ne’ebe de’it  no halo saida de’it. Maibe la’os katak livre husi responsabilidade ba an rasik.
Uluk wainhira sei iha uma, ha’u la hetan privilejiu atu kaer telemovel rasik. Maibe ohin, tan razaun atu mantein komunikasaun,  ha’u konsege hetan lisensa husi papa no mama atu sosa telemovel foun ne’e. Maski nune'e, nia modelu simples de’it la hanesan ho kolega sira seluk nia telemovel ne’ebe mesak ho kámera no mp3 music player. Laiha buat ida too?

Maibé, problema ne’ebe mosu wainhira ha'u kaer telemovel mak  sempre iha  numeru barak ne’ebe miscall halimar deit. Balun lakohi hatán telfone wainhira ha’u telfone fali hodi husu tuir.  
Hufff…gasta ha’u nia enerjia deit! Oinsa sira bele hetan ha’u nia numeru? Karik husi ha’u nia kolega balun ne’ebé susar ba  ha’u  atu buka tuir ida-idak. No ida mak numeru ida ne’e tán! 7791876. Aipah, ne’e dala rua ona nia misscal mai!!!
Ha’u haree ba oras iha telemovel laran. Ups, oras tuku hitu tiha ona! Ha’u tenki han kalan ona hodi kontinua halo ha’u nia tarefa.
Maibe, liu oras ida, telemovel ne’e lian tan ona ho kleur uituan.
‘Sim, boanoite.” Ha’u kumprimenta ho respeitu maibe laran nakali hela.
“Boanoite, ne’e ho Lina ka?”
Oow, mane ida nia lian. Mamar maibe moos.
‘Sim, ha’u rasik. Ne’e ho sé?’ Ha’u mos hatán ho lian mamar.
‘Ha’u ema ida….’
Hah!! Tansá nia hatan badak nune’e?
‘Emm… Ema ida? Ema ida ne’ebe?… deskulpa ne’e ha’u koalia ho sé?’
Nia nonook. Hmm… gosta halo ema penasaran aliás kurioza.
‘OK, se nune’e tansá ita telfone ha’u no oinsa ita hetan ha’u nia númeru?’
‘Lina…?’
Hah? Nia barani bolu deit hau nia naran no seidauk hatan hau nia hahusuk?
‘…Emmm… sim?’ Ha’u  hein atu nia loke an no hein katak nia laos  ema bulak ida.
‘Ita bele sai belun?’ Nia husu ho lian mamar.
Belun? Oinsa nia bele husu nune’e? Kunese malu deit mos seidauk tan?!
‘Belun???... Hein lai. Oinsá itaboot husu ha’u atu sai belun se itaboot la husik ha’u atu hatene itaboot nia naran no itaboot ne’e se?’
Karik nia iha ha’u nia oin, ha’u sei haksesuk makaas ho nia.
‘Lina… o sei hatene ha’u hafoin ita sai belun.’
Estrañu… oinsa nia bele dehan nune’e?
“Hmmm… maibé, tamba sa ita tenki sai belun?”
“Lina… o sei hatene tansá hafoin ita sai ona belun. Agora ita seidauk sai belun.”
“Oinsa? Seidauk sai belun?”
“Sim… ita seidauk sai belun Lina. Tan ne’e mak ohin ha’u husu o  nia hatan atu ita bele sai belun.”
Ha’u nonook hikas. Tansa nia jeitu koalia oinseluk loos?
“Hmmm…. Ha’u presiza hanoin lai.”
“Lina… susar tebes ba o atu hatán pergunta simples hanesan ne’e?”
Tansa nia hanesan fali sisi ha’u?
“Hmmm…. Deskulpa, ha’u nunka fiar ema lalais. Sá tan ema ne’e taka nia an atu ha’u  hatene.”
“Diak… laiha buat ida. Ha’u sei hein  o nia hatán wainhira ha’u telfone fali iha loron aban. OK, kalan diak Lina, mehi diak no até aban…”
“Ate aban.” No ligasaun telfone ne’e mos kotu.

Estranhu… Sé  mak nia? Ha’u hetan ona ema balun telfone ha’u ba dala uluk sempre husu atu kunese malu  mak foin habelun maibe ida ne’e oinseluk fali.  Tansa nia la heteten sai loos deit konaba nia an karik atu kunese malu ho ha’u? Tansá nia husu uluk atu sai belun? Karik ida ne’e jeitu  foun mane ohin loron nian? Oinseluk loos….

Kalan ba dadauk ona no insidenti ida ne’e halo ha’u ulun moras ona atu buka tuir ema ne’e nia motivu ho maneira foun ne’e.
                                                     
Ha’u nia kakutak mos hahu kolen atu analiza bebeik akontesimentu ohin ne’e. Ho matan dukur ha’u hakat ba kama hodi latan no taka an ho lensol. Nai..ha’u agradese tebes ba kmanek ohin loron nian maibe mane estranhu ne’e halo ha’u nia kalan ne’e nakonu ho ai-sasiik.

Kontinua....

Komentar

Posting Komentar

Postingan populer dari blog ini

Aprende husi Sócrates: Ta’es Dala Tolu

Gambar
Sócrates mak ema matenek-nain ida husi Igregu. Nia ema ida be naran boot tamba ninia kuinesementu no sabedoria ne’ebe klean.  Loron ida, iha mane ida mai hasoru malu ho Sócrates no hateten,  “Itaboot hakarak hatene saida mak ha’u foin rona konaba itaboot nia belun ida?’’ “Hein lai,” Sócrates hatán.   “Molok itaboot fo hatene ha’u konaba buat ruma, ha’u hakarak itaboot passa lai ezame kiikoan ida. Ezame ne’e hanaran Ta'es Dala Tolu. ” “Taes Dala Tolu?” Mane ne’e husu. “Loos,” Sócrates hatán.  “Molok itaboot hateten mai ha'u konaba ha’u nia belun, karik diak liu fó tempu uituan hodi ta’es lai buat ne’ebé itaboot atu hateten. Ida ne’e ha’u bolu dehan ezame ta’es dala tolu. Ta’es dahuluk nian mak LIALOOS . Itaboot garante ona katak buat ne’ebe itaboot atu hateten mai ha’u ne’e loos?" “Lae” mane ne’e hatán, “loloos ne’e ha’u foin mak rona no hakarak atu fo hatene ba ita.” “Diak,” Sócrates hatan.  “Se nune’e
Baca selengkapnya

KONABA DOMIN

Gambar
Obra Kahlil Gibran husi Livru O Profeta   Tradusaun livre ba lian Tetum husi Vitalia Ze Hafoin,   Al-Mithra hateten: Koalia to’ok mai ami konaba domin. No nia fila oin hodi hateke ba povu hotu iha ne’ebá be mohu iha nonook nia laran. Nune’e, ho lian makaas, nia hateten: Wainhira domin fo bodik hodi bolu o, tuir nia ba, maski ninia dalan sira mesak toos no   kroat. No wainhira ninia liras sira hakuak o, entrega o nia an ba nia, maski surik ne’ebe naksubar iha ninia liras leet   bele hakanek o. No wainhira nia koalia ba o, fiar ba nia, maski ninia lian bele harahun o nia mehi sira nudar anin tasi-feto be sobu-rahun jardiin. Nudar domin sei tau koroa ba o,   nune’e mos mak nia sei krusifika o. Nomós, nudar nia bele haburas o, nia mos bele hamenus o.   No nudar nia bele harii-an aas hanesan ho o no book o nia sanak sira be mamar   liu ne’ebe nakdedar iha Loro-matan okos, sei sai nune’e mos mak nia dada-tuun   o nia abut sira be metin i
Baca selengkapnya

Domin no Diferensa

Gambar
Wainhira sei eskola, ha’u iha belun mane no feto ida ne’ebe laran monu ba malu no hahu sira nia relasaun domin iha tinan dahuluk eskola nian. Maski   nune’e, sira nia relasaun   hasoru diferensa iha ida-idak nia tinan, hahalok no hanoin hodi halo sira dalaruma hirus malu no kuaze atu fahe malu. Belun feto ne’e dalaruma senti laran nakraik nune’e iha tempu ruma nia fahe nia sentimentu ba ha’u nomos belun feto maluk seluk ne’ebe nia konfia atu hato’o nia problema.  Iha kalan ida, ha’u mehi   konaba nia no nia doben. Iha loron tuir mai, ha’u hasoru belun feto ne’e, ha’u haree katak nia la duun kontente tan ninia problema no sintimentu sira.  Ha’u konta tuir ba nia oinsa ha’u mehi haree nia no nia doben hirus malu makaas to ’o nia tanis senti la bele hodi sai konfuzaun lahatene atu halo oinsa loos. Iha mehi ha’u hakbesik nia hodi dehan: ‘’Belun, iha mundu ne’e, laiha mane ne’ebe perfeitu maibe sei iha domin ne’ebe perfeitu….”. Ha’u ho ha’u nia belun sai bilaan ba momentu
Baca selengkapnya