Ha’u Hanoin....Afinal (Parte 3)

 

Parte 3

Bainhira?

"Ha'u fuan hein hela momentu ne'ebe o promete..."

'Lina...oinsa mak o bele rende tiha de'it nune'e?'

Izza hakfodak hodi hateke meti-metin ha'u ho espressaun la fiar hafoin ha'u konta akontesimentu hodikalan nian. Ha'u fo sinal atu nia hatuun nia lian tan ami iha hela sala biblioteka nia laran.

'Izza, ko'alia neneik uituan ba. Orasida ema hotu rona ona mak ne'e. Be ha'u koalia sai tiha ona ne'e. Ha'u koko  trata no hakilar ona nia maibe nia mos la rende ida. Tuir o nia hanoin se nia jeitu hanesan ne'e, ne'e mane ne'ebe di'ak ka lae?' 

Ha'u husu fali nia hodi haloot livru sira ne'ebe ami foti husi armariu. Agora ami tuur iha meza kabuar ida iha sala estuda nian.

'Linaa, ha'u laos peritu konaba mane maibe ha'u kuinese ona mane barak no sira nia maneira. Ba ha'u, o nia kazu uniku uituan. Maibe, ha'u sujere o la bele fiar lalais de'it nia. Hmm, naran saida mak ne'e?'

'Gil."

'Oh, sim. Gil ne'e. Sa tan imi rua ko'alia husi telfone de'it. O seida'uk tan kuinese nia. Ohin loron mane barak mak gosta lohi feto husi telfone mak ne'e. No aat liu mak sira ne'e barak mak kaben-nain tan.' 
Ha'u nonook hateke metin Izza.

'Tan ne'e Lina, maski nia hateten katak nia hakarak de'it atu sai belun, ha'u senti o la bele garante ida ne'e pursentu atus-ida. Ha'u fiar ne'e maneira de'it atu manan o nia fuan. Hafoin ida ne'e mak o hare'e to'ok. Nia sei dehan katak nia gosta o no husu o sai nia doben. Nune'e imi rua nia relasaun sei transforma husi belun ba doben. O prontu ba ida ne'e?'

Izza nia esplikasaun naruk ne'e halo ha'u nia nonook amenta tan ho laran-ruak. 

'Diak Izza, ha'u sei tetu buat ne'ebe o sujere.Ha'u mos senti konfundi ho nia. O hatene nusa, hodikalan molok nia taka telfone, nia dehan nia tenki taka ona tan aban ha'u tenki eskola. Hare'e to'ok, oinsa nia bele hatene dehan ha'u eskola hela se ha'u seidauk hateten nia dehan ha'u eskola-oan? Estranhu ka lae?'

'Hmmmm... Ha'u senti nia kuinese hela o eh ema ruma iha ne'e mak hatudu o ba nia.'

'Ida mos mak ne'e. Maibe Izza, ema nia aman ne'e halo ha'u kurioza loos sah..'

'Ai Nai, para tiha ba. Foin rona lian de'it o nune'e tiha ona sa tan imi hasoru malu. Ha'u espera Gil ne'e oin furak,  sei klosan no komportamentu diak. Maibe sai mai mak kaben-nain ida, ne'e sah abin, favor hakmatek tiha ba...'

'Iiiih Izza, keta duun nune'e ba be diak. Ha'u espera bele hatene uluk nia maibe depois mak ita hare'e. Agora ha'u tenki tama ona aula meudia nian.' 

Nune'e, ha'u ho Izza fahe malu iha sala estudante biblioteka nian no kontinua ida-idak nia atividade akademiku loron ohin nian. 

Izza no ha'u estuda hamutuk iha departamentu edukasaun no ami tama ona ba semestre datoluk nian. Izza mak belun ne'ebe metin liu ho ha'u,  nomos ba ha'u,  nia mak ha'u nia 'assessora' ne'ebe diak liu tan wainhira ha'u hato'o problema hotu nia sempre rona, analiza no fo hanoin ba ha'u molok ha'u foti desizaun. No nia mos matenek atu rezolve ha'u nia problema sira ne'ebe ha'u hato'o. 

Durante habelun ho nia, ha'u hare'e katak nia ema ne'ebe mak kakutak been loos alias matenek,  nia sempre hetan valor diak. Maibe maski nia matenek nia la foti an. Kolega ho Izza halo ha'u hetan motivasaun atu bele estuda didiak hanesan nia tan nia rasik mos sempre ajuda ha'u atu  bele aprende no komprende materia sira ho diak.  Nia sempre ajuda ha'u iha diskussaun ba asesmentu ruma iha grupu ka individual. Ha'u senti ha'u nia moris nudar estudante no foinsa'e kompletu loos ho prezensa belun perfeitu hanesan nia. 

Kalan ne'e ha'u latan iha kama hodi hateke ba ha'u nia telfone no hanoin kona konselu husi Izza.    Ha' u senti Izza nia hanoin ne'e loos tebes. Oinsa ha'u bele fiar katak Gil ne'e ema diak? Oinsa se karik nia ne'e mane kaben-nain ida ne'ebe bulak-feto no hakarak halimar de'it ha'u? Ha'u konfundi tebes...

 Krriiiiiiiiiiiiiiiiinggggggg...!!!

Aww... !!! Telfone nia lian ne'ebe mosu derepente halo ha'u hakfodak hodi kaer telfone ne'e la metin nune'e monu kona ha'u nia rentos. 

Ups... afinal tamba monu kona ha'u nia rentos, halo telfone ne'e ativu hodi hatan ba ida-nebe telfone mai. No afinal, ne'e husi Gil!

'Sim, boanoite...'

'Boanoite Lina. Diak ka lae?'

'Gil?'

'Sim Lina, ne'e ha'u Gil. Se la'os ha'u se tan?'

 .... Iiiih, par fiar-an ida. Ha'u dehan ba hau nia an no dada iis naruk molok atu hataan nia.

'Hmm... hai Gil. Ha'u diak. Obrigadu.'

"Hmm..ha'u senti o ladun diak karik?"

"Hah? Oinsa ita bele dehan nune'e?"

"Tan ha'u bele senti o dada iis makaas loos no ha'u bele siik karik o foin fai ulun ba ba buat ruma eh o nia ulun kona buat ruma ne'ebe halo o senti moras uituan.' 

"Gil, oinsa ita hatene?"

"Wainhira o simu telfone, ha'u rona o hakilar no ha'u siik karik ne'e kona loos o nia rentos. Ha'u espera katak la'os telfone mak kona o nia rentos..."

Grrrr. Sorte ha'u la dehan sai. Uhh, ha'u senti ha'u nia rentos manas los ona.

"Giil, o kal matan-dook ida karik. O bele hatene tiha de'it ne'e.Mas ha'u senti o laiha sentimentu. Envez dehan kuitadu mai ha'u hetok goza fali ha'u. Ha'u duvida, ita bele sai belun diak ka lae?'

"Ok Lina, entaun ha'u husu deskulpa no fo kuitadu. Ha'u hakarak goza o atu ita rua la bele tauk malu tan ha'u senti o sei tauk hela ha'u.  Tan ne'e, lalika duvida mai ha'u no lalika bolu hau ho itaboot. Ne'e formal liu."

"Ok. Maibe Gil...oinsa ha'u la duvida ba o se ha'u seidauk hatene o ho loloos.  O hatene ha'u nia numeru, no hatene mos katak ha'u eskola maibe laos hau mak fo hatene buat hirak ne'e. Oinsa o  bele hatene ha'u Gil?"

"Lina, wainhira ema ida hakarak atu halo belun ho ema seluk, nia sei halo esforsu ruma atu hatene ema ne'ebe nia hakarak habelun ne'e no buat hotu sei sai possivel ba nia. Konaba o, depois ha'u sei fo hatene wainhira ita hasoru malu. Maibe oras ne'e, ha'u hakarak o fiar uluk ha'u."

"Gil, oinsa ha'u bele fiar se ha'u la haree o ho matan. Ha'u tauk karik o ema kaben-nain ruma. Se nune'e duni, favor para telfone ha'u. Tan ha'u lakohi atu hetan problema..."

"Hahahhaha... Lina, Lina. O mos komik"

"Saida mak komik Gil?"

"Lina, ha'u hakarak dehan loloos ba o. Oinsa ha'u bele sai kaben-nain se ha'u seidauk hola-feto?"

"Entaun, sei klosan?"

"Sim."

"Oinsa karik, Gil iha ona doben ruma?"

"Doben? hmm seidauk Lina. Ha'u sei buka hela."

"Oh.. ne'ega? Hetan ona balun?"

"Hehehehe... seidauk. Maibe, iha tempu besik ha'u sei hetan."

"Hmm... OK."

"OK saida Lina?"

"OK katak ha'u bele fiar ona Gil maski seidauk persentu atus-ida."

"Ok, laiha buat ida. Hahu uluk lai ho persentu ida no restu depois mak ita hala'o de'it."

"Gil.... o par oinseluk".

"Sim... tamba ha'u uniku."

"Gil... o halo ha'u koalia mak ladiak hehhehhe. Maibe, bainhira ita bele hasoru malu?"

"Hmmm, bele bainhira de'it. Maibe, laos iha tempu besik."

"Tamba sa?"

"Ha'u hanoin ba agora ita mantein hanesan ne'e lai. Maibe, la dehan katak ita sei la hasoru malu. Ita hasoru malu Lina. Maibe ha'u hakarak ita marka tempu iha loron espesial atu hasoru malu. Nune'e ita nia habelun ne'e bele husik ruma espesial mai ita rua.Oinsa Lina?"

"Tenki hanesan ne'e ka Gil?"

"La tenki nune'e. Ha'u hakarak de'it atu wainhira ita hasoru malu, sei sai hanesan belun tuan ne'ebe hasoru malu laos ema fuik leet ne'ebe tauk malu. Ha'u hatene o tauk Lina maibe fiar ha'u ba. Bele?"
"Hmmmmmm... se nune'e entaun loos ona. Maibe Gil ..."
"Sim Lina, nusa tan?"
Ha'u nonook lesuk. 
"Hmm... ha'u bele hatene o serbisu eh estuda ruma karik?"

"Lina, ha'u sei hatan ida ne'e wainhira ita hasoru malu."

"Maibe bainhira Gil?"

"Hmmm... Diak. Ita hasoru malu iha loron Valentine. Bele?"

"Valentine?  Tansa?"

"Keta husulai  tansa, depois o sei hatene. Hatan lai bele ka lae?"

Ha'u nonook hikas.

"OK Gil. Valentine."

"Diak. Se loos ona. Ita-rua nia dadalia para lai. Depois ita kontinua fali. Kalan Diak no mehi diak Lina."

"Kalan diak Gil.."

Ligasaun kotu no ha'u mos dada iis naruk hodi halivre ha'u nia an husi nakdedar no tensaun ne'ebe ataka ha'u durante ami koalia. Ahh, tansa Gil nia influensa maka'as nune'e mai ha'u? Afinal ha'u sei dauk hare'e nia oin maibe senti ba koalia ho nia hanesan kuinese ona ho nia durante tinan balun. 

Ha'u hateke ba kalendariu ne'ebe tara iha didin-lolon kuartu nian. Sei falta loron neen tan atu hasoru malu ho nia iha sabadu oin mai. No ha'u senti loron neen ne'e sei budu ha'u nia kuriozu konaba ba nia. Gil... o halo ha'u senti oinseluk..... 

Ha'u foti telfone no hateke ba oras. Besik tuku sanulu-resin-rua ona. Nai! afinal, ami mos ko'alia kleur pah. Ha'u tenki toba ona!

Kontinua.................................