Ha’u Hanoin....Afinal (Parte 4)

Parte 4

Valentine ho nia. 

Wainhira ha'u dehan hakarak sai o nia belun, dalaruma ha'u nia fuan mos hakarak habelun ho o 
*****

-Laiha buat ida mak hanaran estranjeiru, buat ne'ebe iha mak belun ne'ebe ita lada'uk hasoru. -

-- Anonimu

 Ha'u hamnasa midar tiha wainhira lee mensajen husi Gil ho liafuan sitadu  hatudu iha ha'u nia ekran telfone. Izza hateke ha'u doko ulun de'it.

"Hmm, komesa hamnasa mes-mesak de'it ona mak ne'e. Ne'e kal mensajen oan ne'e lori liafuan todan karik..."

Ha'u hamnasa de'it hateke Izza ne'ebe goza ha'u maibe iha ha'u nia laran la hatene tansa ha'u sente naklekar tebes. Loos duni katak loron hirak ne'e ha'u hare'e Gil nu'udar ema estranjeiru ida ne'ebe fuik no leet mai ha'u, maibe se ha'u ho nia bele sai belun, konserteza ami la'os ona sai estranjeiru ne'ebe hare'e malu hanesan ema fuik leet.

"Izza, ha'u senti Gil ne'e ema diak. Hodikalan nia telfone ha'u no ami atu hasoru malu." Izza hateke ha'u ho matan-fukun namkurut.

"Ne'ega? Ha'u la bele dehan nia ne'e diak ka lae tan ha'u la komunika ho nia diretamente. Maski nune'e, ha'u husu o atu kuidadu nafatin. Husu boot nia la haruka imi rua  hasoru malu iha fatin naktakan. Ne'e perigu Lina."

"Izza, nia seidauk dehan atu hasoru malu iha ne'ebe maibe ami sei hasoru malu iha loron Valentine."

"Valentine?"

"Sim. Nusa? Ladiak ka?"

"Hmmmm, Lina. Laos ladiak maibe nia oinseluk. OK.. maibe atu oinsa mos ha'u intrega fali ba  o atu foti desizaun hakarak kontinua habelun ho nia ka lae. Maibe Lina, ha'u husu o kuidadu. Mane balun ohin loron oioin de'it. Se imi hasoru malu karik buka fatin ne'ebe publiku no seguru."

"Obrigada Izza. O belun ne'ebe kompreende tebes ha'u."

Hafoin nune'e, ami mos fahe malu ba aula ida-idak.

Hahu husi loron ne'e ba oin ha'u sempre hateke kalendariu hodi sura loron bainhira mak bele to'o loron 14 Febreiru atu ami bele hasoru malu. Estranhu katak kuriosidadi atu hasoru malu ho nia dada liu ha'u nia atensaun.Sa tan hafoin telfone ikus ne'e, Gil la telfone ona ha'u no halo ha'u konfuzaun. Karik nia haluha ona ha'u eh karik nia la seriu? Karik ha'u tenki dada-an no konsidera ami nia relasaun ne'e hanesan mehi de'it? Maibe oinsa? Hufff... tansa ha'u sai laran la metin nune'e?

Hafoin passa loron ba loron ikus mai momentu ne'e to'o duni ona.  Iha daadeer ne'e ha'u realiza katak ohin ne'e loron 14 Febreiru ne'ebe mos ema barak selebra nudar loron Valentine ka loron domin. Maibe ba ha'u, seidauk fiksu katak ha'u mos atu selebra loron domin hanesan sira seluk. Maibe se  temi loloos karik, ha'u atu selebra loron kuinese malu, kuinese malu  ho Gil ne'ebe ha'u hakarak atu hare'e nia ilas loloos ne'e oinsa.

Ha'u foti telfone hodi lee mensajen foun ne'ebe tama no ida ne'e husi Gil duni. Yess!!! Finalmente.

Lee tiha mensajen ha'u mos prepara-an dadauk ona.

Loraik ne'e, jardin Largo Lecidere sei nakonu ho foinsa'e no kaben nain sira ne'ebe hakarak passa tempu hamutuk hodi selebra loron domin iha ne'eba. Oras hatudu tuku haat iha hau nia relojiu. Ha'u hahu hakat ba tuur fatin ida iha Ai-hali Portugal  ida nia okos ne'ebe mamuk no la duun nakonu ho ema. Ha'u senti ha'u mak to'o uluk. Ho hakmatek ha'u tuur hodi hateke ba sori-sorin karik iha mane ruma ne'ebe liu.

Husi distansia ne'ebe la duun do'ok ha'u bele hare'e labarik foinsa'e sira tuur hamutuk iha par rua-rua hodi dadalia no balun tuur rabat malu, hakuak malu no ate to'o rein-malu. Ha'u derepente senti hakribit hare'e buat hirak ne'e, se laos tanba Gil ha'u mos lakohi atu mai iha fatin ida ne'e.  

La senti, afinal liu minutu tolu nulu ona maibe ema ne'ebe naran Gil ne'e la mosu de'it mai. Afinal, ami promete ona atu hasoru malu iha tuku haat loraik ne'e maibe to'o agora oras la'o dadauk no ha'u mak nafatin hein mes-mesak. Bilan iha ema barak nia leet, iha Largo Lecidere ne'e. 

Ha'u iha tiha ona Largo. Gil iha ne'ebe?

Ha'u haruka mensajen ne'e ba Gil no hein nafatin resposta. Liu minutu sanulu tan ona, ha'u koko telfone Gil, maibe telfone mate hela de'it.

Eipah! Karik nia haluha? Ka sei tuir dalan? Ka nia finji hakarak koko ha'u? Oh Gil, favor, tansa tenki halimar subar nune'e? Halo moris komplikadu de'it. Ha'u hare'e manuliin kiik oan rua tuur hela iha Ai Hali ho intimu tebes. Laloran tasi akompanha ho anin malirin loraik hatudu sira nia atraksaun furak ba ha'u nia matan enkuantu ha'u hein hela. Buat hotu furak maibe ha'u neon nakonu ho hahusuk. Gil... o sei mai duni ka lae?


Hein mak hein, oras mos hatudu ona tuku lima loraik iha ha'u nia telfone. Husi ha'u nia fatin ha'u hare'e lalehan nakfilak ona ba koor mean no roxu hatudu katak rai nakaras ona. Maibe laiha sinal ruma husi ema ne'ebe ha'u hein. . Ha'u la bele hein kleur tan, ha'u tenki fila ona.

OK. Los ona....!!! Ha'u hateten ba ha'u nia an ho dada iis naruk hanesan ema treinu iha aula ioaga nian no hakat ain sai kedas husi fatin ne'e. Taxi kor kinur ida mai besik  no ha'u para kedas atu sa'e.

Tama taxi laran, ha'u senti ha'u nia matan manas no laran nakali.

Ha'u sadere ha'u an hodi hanoin tuir loraik ne'e. Ha'u mak beik ka tempu ne'e mak la permite duni? Ha'u la komprende, sa mane mak bele promete no la halo tuir nia liafuan?
Sa mane mak husik hela feto ida hein nia to'o loraik no la fo netik mensajen ruma?
Sa mane mak halimar hanesan ne'e? Loron Valentine ne'ebe aat teb-tebes!!!

Kontinua.........