Ha’u Hanoin....Afinal (Parte 5)

 Parte 5

  Husik Liu

Iha loron ne'e udan tau makaas no halo rai malirin. Tuur iha jardin kolejiu nian halo ha'u senti malirin ne'e borus loos kedas ha'u fuan be satiadu hela tan akontesementu horiseik nian.

''Lina, to'o ona. Keta muron hanesan ne'e tan. Orsida o nia oin aat ona mak ne'e. "
Izza hamaus nafatin ha'u maibe ha'u la aguenta duni. Ha'u senti ha'u nia matan manas loos.

"Izza, ha'u nunka hetan ema joga ha'u aat hanesan ne'e, depois iha loron Valentine tan. Imajina to'ok, horseik ha'u mak iha neba tuur bilan mes-mesak hein nia to'o loraik nia la mosu deit? Ne'e aat tebes pah."
Izza dada iis deit hodi kaer metin ha'u nia kaba'as.

'Ok Lina, ha'u komprende sa mak o senti agora. Ha'u hatene ne'e aat loos. Maibe o tenki simu ida ne'e nu'udar lisaun ida. Iha tempu oin mai o tenki kuidadu ho mane ruma ne'ebe hakarak hakbesik o. To'o ona Lina, koko atu husik liu tiha ba, tamba o nia futuru sei naruk. Sorte diak katak nia la halo aat liu tan ba o. Los ka lae?'

Ha'u dada iis naruk no ami rua Izza nonook ba minutu balun. Izza dehan loos duni, tansa ha'u preokupa loos ida ne'e afinal ha'u nia futuru sei naruk atu ha'u bele hetan liu ida ne'e?

'Izza, obrigada barak. O ko'alia loos. Ha'u mak beik tamba monu tuir  ninia lasu. Ha'u sei foti ida ne'e sai lisaun hodi sai feto diak liutan.'' Izza hamnasa midar ba hau.

'Entaun, atu  halakon o nia triste orsida loraik ha'u konvida o mai ha'u nia uma tuir ami nia han-hamutuk. Ida ne'e programa  kiik-oan ami familia uma laran de'it. O bele mai tuir ka?"

"Hmm... Izza, tamba o mak fo bodik ona. Ha'u dehan sim deit ona. Han hamutuk saida nian mak ne'e?"

'Ha'u nia maun Rio mak halo tinan.' 

'Maun Rio? Se mak ne'e?' Ha'u senti naran ne'e foun tebes ma'i ha'u.

'Na'i... Lina, keta dehan o haluha. Ha'u konta ona ba o dehan ha'u maun-alin hamutuk nain rua de'it. Ha'u ho maun Rio de'it no maun Rio mak boot.

'Oh... sim. Deskulpa, ha'u haluha uituan sah...'

'Na'i... Lina, o nia kakutak  semana hirak ne'e karik nakonu ho Gil deit mak o bele haluha buat hotu  ne'e..? Sorte o la hetan duni Gil ne'e. Ne'e mak horseik hetan duni karik, dalaruma ha'u mos o haluha tiha ona..' Izza doko ulun de'it hare'e ha'u no hafoin ne'e ami hamnasa kakadak.

Husi ne'e, ha'u hahu realiza katak buat ne'ebe akontese horsek hanesan lisaun boot ida mai ha'u atu la fiar leet deit ema ruma ne'ebe ho hahalaok hanesan. Ha'u promete ha'u nia an atu la monu tan ba ema ne'ebe fo esperansa falsu no la halo tuir nia liafuan.

Husi ne'e ha'u hahu promete mos katak ha'u sei kuidadu liutan iha tempu oin mai wainhira kuinese ema foun ruma. Tan ha'u nia fuan la'os sasan folin-laek atu fo ba ema hodi estraga halimar hanesan ne'e. Ho laran todan ha'u loke fali mensajen hirak husi Gil no hafoin dada iis naruk no klean ha'u hamos hotu mensajen hirak ne'e molok ha'u hamriik hodi kontinua ha'u nia atividade loron ohin nian.

Kontinua......