Mane-foun ba Tia Joana (1)

 

image: Jimmy law- South African artist

"Mor, tinan foun ne'e ne'e ha'u hakarak ba hasoru o nia familia iha uma."  Zeze hateten ba nia doben Nita. Sira-rua tuir ona durante tinan rua ikus ne'e. Sira rua tuur hela iha Restaurante ida iha Timor-Plaza iha loraik ne'e.

Nita nonook lesuk hateke metin ba kuadru-avizu filme foun taka iha sinema Platinum Cineplex nian iha kraik ne'eba. Zeze simu livru menu husi servente no hameno Bakso mangko rua ho orange juice. Zeze nota dadauk iha sentidu la komfortavel husi ninia doben.

"Mor. O diak hela too?" Zeze husu tan. Nita hahu hateke nia ho atensaun.

"Ha'u diak hela Ze maibe rona dehan  o atu ba ha'u nia uma iha tinan foun ne'e mak halo ha'u hanoin hela."

"Nusa ne'e?  Mor seidauk hakarak ha'u ba  uma ka. Se Mor seidauk  prontu laiha buat ida. Ita bele buka tempu seluk"

"Lae Ze. Laos hanesan ne'e. Mama mos hameno hau atu ita rua bele mosu netik iha ne'eba lai iha tinan foun ne'e. Maibe Ze, o hakarak hatene? Tinan foun iha ami nia uma sempre sai preokupasaun ida." Nita hataan ho oin laran-ruak.

"Tambasa Mor?"

"Ne'e tamba bin Nina nia laen, maun Abeto. Nia sempre lanu todan wainhira kalan-troka-tinan iha loron 31 Dezembru."
"Mor, ha'u sente buat hemu tua barak to'o lanu-todan ne'e normal iha kalan-troka-tinan. Imi familia festeza kalan troka-tinan-foun nian too."
"Sim Ze. Maibe maun Abeto nia lanu todan ne'e mak lanu-todan ida beik nian."
"Ne'ega? Be nia lanu-todan ne'e oinsa?"

"Kuandu lanu-todan ona, maun Abeto sai haluha an. Nia fila tolok no trata liafuan mesak aat ba  mama no familia to'o rai-loron tiha de'it. Ha'u tauk wainhira o iha ne'eba nia lanu arbiru bele baku o Ze."
"Oh hanesan ne'e. Laiha buat ida Mor. Diak hela sah. Mak nia mai, ha'u sees an tiha de'it too. Ha'u hatene satan ha'u nia an sah. Keta hanoin barak be diak. Negaa?"  

Nita hateke ba Zeze hodi fo hamnasa midar hafoin dada iis naruk sinal laran-kmaan nian. Servente mos mai hatuur bakso mangko rua no orange juice ba sira nain rua iha meza leten no hetan obrigadu husi Nita no Zeze molok nia hakat fali ba nia fatin. Loraik ne'e anin malirin huu ba mai iha area Timor Plaza nian maibe Nita mak hanoin kona nafatin lalaok tinan foun iha nia uma iha munisipiu B.

 ****
Tinan foun, 2006. 

Iha kalan troka-tinan, Abeto sempre lanu beik no tolok nia banin tia Joana Marques, inan husi Nina, Nita, Ato no Ano. Abeto NIA lanu beikhalo tia Joana sai nervozu liu no haruka kedas nia feen, Nina ba bolu nia laen husi estrada ne'eba. Bin Nina ba bolu duni maibe Abeto lakohi mai uma no hetok tolok tan deit Nina no nia banin-feto iha matan laran.

Wainhira nune'e, bin Nina la aguenta no halai tama tiha uma-laran tamba moe loos maibe tia Joana mak sei ba rasik bolu Abeto no siak nia iha estrada ne'eba. Ne'e mos Abeto la rona no hetok goza tan nia banin-feto ho kondisaun lanu. Nune'e tia Joana sei silu sereja sanak iha sira nia uma oin no uza hodi baku tuituir Abeto to'o sereja sanak ne'e sai tuuk hotu. Mak Abeto nafatin lakohi mai uma, tia Joana haruka nia oan mane Ano ho Ato hodi ba dada obriga Abeto mai uma eh baku no tuku nia to'o dolar mak rasta de'it mai iha uma karik nia lakohi rona sira. Iha dadeer loron 1 Janeiro, ema sira ne'ebe liu ba mai estrada atu ba missa sei hateke konflitu banin-ho-mane-foun ne'e ho doko ulun hodi konta familia tia Joana tuir dalan nudar dadalia dadeer nian. Ho ida ne'e, Abeto sai famozu ho titulu mane-foun lanuteen iha familia Marques.

"Nina, o hare'e ona ka lae? Uluk hau koalia o la rona. Hola mane kiak tiha ona, mak nia respeitu ba nia banin mos laiha. Porra pah!!!!!" Tia Joana murmura, hateke Nina ho oin toos no dada iis tuun-sa'e. Durante nia moris iha bairo Sarmaleen, tia Joanna nunka senti moe boot hanesan ida  ne'e.

Nina rona liafuan ne'e hodi hakruuk nonook de'it. Abeto toba dukur iha kama laran ho oin fitar tan tuku husi Ano no Ato no fitar sereja sanak mean hela iha nia liman no ain ne'ebe tau deit kalsa badak no kamizola ADIDAS koor metan. Nina hateke Abeto ho liman kumu metin de'it. Bebeik ona nia husu Abeto atu la hemu-lanu hanesan ne'e maibe Abeto lakohi halo tuir. Ne'e akontese bebeik ona desde Abeto sai mane-foun familia Marques husi tinan sia liuba. Fofoun Nina koko aguenta tan hanoin katak ne'e efeitu normal festeza tinan foun nian maibe afinal wainhira iha okaziaun festa seluk ruma iha uma mos Abeto gosta lanu todan hanesan ne'e. Bebeik nune'e mos Nina no familia la aguenta no sente moe tebes ba vizinhu sira. 

Tempu uluk

Nina oan feto-boot husi maun no bin alin nain haat, feto rua no mane rua, oan sira husi Senhora Joana Marques no Senhor Mario Marques ne'ebe mate tiha ona tamba hetan tiru husi militar iha tempu okupasaun Indonezia. Maski nune'e Senhor Mario wainhira sei moris konsege serbisu nudar diretor no husi nia serbisu ne'e konsege harii uma mutin boot ida ba nia familia, simbolu riku-soin ne'ebe nia husik netik. No ida ne'e sai tia Joana nia responsabilidade atu mantein buat hirak ne'e  ba oin.

Hafoin Senhor Mario mate, senhora Joana mak foti responsabilidade hotu ba sira-nia oan nain haat nia moris no hakarak atu sira hetan futuru diak. Senhora Joana kuinesidu iha nia Bairo Sarmaleen nudar tia Joana durante  ne’e serbisu nudar funsionariu publiku iha insituisaun estadu desde tempu indonezia. To’o tempu ukun-an mos nia konsege hetan tan oportunidade sai funsionariu publiku iha instituisaun lokal ida iha nia distritu. Alende serbisu nudar finsionariu, tia Joana mos serbisu buka osan iha uma hodi halo dosi bolus no keek ne'ebe ema hameno wainhira lia ruma hanesan kazamentu, prenda, lia mate ka festa seluk ruma. Negosiu kiik ne'e halo nia manan osan natoon hodi amenta ninia rendimentu. Osan natoon husi serbisu no negosiu halo dosi ne'e mak nia uza sustenta nia familia liu-liu ba nia oan sira atu eskola to'o nivel universitariu no aban-bairua bele hetan serbisu nudar nia laen matebian hameno ba nia wainhira sei moris. 

Ho tia Joana nia esforsu ne’e, ohin loron nia oan Nina konsege sai funsionaria publika iha instituisaun governu lokal ida iha sira nia sidade. Tia Joana reforma tia ona no kontinua de'it nia negosiu iha uma. Entretantu, Nita,  nia oan daruak mos gradua tiha ona husi universidade iha Indonezia ho titulu lisensiatura jestaun finansa. Ato oan mane datoluk hein atu remata ona teze ba lisensiatura tekniku civil  iha Indonesia no Ano nia oan mane ikun sei eskola iha sekundaria 12-ano. Tia Joana sente orgulhu tebes ho nia oan sira nia progresu. Maski nune’e, nia hakarak nafatin atu sira mos bele hetan vida familia ne’ebe diakiha futuru tan ne’e nia prefere nia oan sira atu bele kaben ho familia ne’ebe riku no iha reputasaun diak iha sira nia sosiedade nune'e bele sai orgulhu ida tan ba nia iha nia bairo.

Infelizmente, buat ne’ebe nia mehi la realiza wainhira Nina lori nia doben Joel mai uma iha tinan tolu liuba. Nina no Joel tuir malu ona desde Nina sei eskola iha universidade iha Dili. Tia Joana  kuinese Joel mai husi familia simples deit iha sira nia sidade nune'e nia hatudu kedas oin malirin hodi la hasee Joel no ba tiha tuur iha varanda uma kotuk no suku hena pontu-krus. Joel sente an ho jeitu ida ne'e no fila tiha de'it.

Nina nota atmosferu ida la habelun nian, tesik kedas ba varanda uma kotuk hodi  kestiona nia mama:

"Mama, Joel mane ne'ebe diak tansa mama hatudu jeitu hanesan ne'e ba nia?"

"O mak o nia hanoin laiha Nina. O la hatene Joel ne'e se nia oan? Ha'u kuinese nia familia. Sira familia kiak. Ha'u lakohi o nia vida monu ba familia kiak." Tia Joana hataan hodi kontinua suku hena, tuu daun ba mai.

"Mama, Joel ema ne'ebe badinas no hatene buka serbisu mama. Aban bairua nia bele muda familia nia moris." Nina argumenta.

"Lae Nina, ne'e la garante. Se mak hatene aban bairua nia la buka serbisu no o mak serbisu hela de'it?" Tia Joana hateten.

"Mama, keta hanoin hanesan ne'e lai. Ami rua hadomi malu mama. Ha'u fiar nia sei la halo nune'e." Nina hatan lesuk tan.

"Hadomi? Agora imi hadomi malu. Hola malu tiha mak imi hatene saida mak hadomi malu. Hadomi malu de'it la to'o Nina. Hakarak hola mane, hola mana modelu hanesan o nia aman. Nia hatene liu oinsa kaer responsabilidade ba nia familia." Tia Joana kontinua hatan.

"Oh mama, halo favor. Joel mos mane ida hatene responsabilidade. Ami rua hakarak hola malu mama." Nina hateten ho matan hamaus ba nia inan.

Tia Joana hakfodak ho liafuan ikus ne'e. Nia para kedas suku hena no hateke  metin Nina.

"O dehan saida? Hola malu? O  hanoin ha'u atu fo deit imi rua hola malu hanesan ne'e? O nia aman mak sei moris mos sei lakohi atu imi hola malu. Ha'u dehan lae Nina. Ha'u lakohi o hola malu ho nia. Mak ne'e de'it!!!"

Tia Joana taka haksesuk malu ne'e hodi hamriik foti ho hena pontu-krus be suku la hotu ne'e tau iha lata kabuar biskoitu Danish lao ba nia kuartu husik Nina hamriik mesak ho laran nakhois.

Tamba de’it Joel mai husi familia kiak, tia Joana lakohi liu atu simu nia sai mane-foun no haruka Nina tenki husik tiha Joel maski ikus mai sira deskobre katak Nina  isin-rua tiha ona. Nina koko konvense no hamaus nia inan atu bele simu Joel maibe tia Joana nafatin lakohi. Liu tiha fulan rua hanesan ne'e Nina hetan raan-fakar makaas no halo nia lakon bebe ne'ebe nia kous husi Joel.

Tia Joana hakfodak wainhira akompanha Nina nia kondisaun no sente hanesan hetan piadas wainhira doutor ne'ebe atende Nina hateten katak Nina nia kondisaun kauza husi stress emosional ne'ebe makaas. Maski nune'e, tia Joana lakohi atu lambe fali nia kabeen ne'ebe nia tafui ona. Maski Nina nia doben nia familia mai to'o uma husu atu koalia konaba Joel ne'ebe hakarak hola Nina, tia Joana nafatin rejeita sira nia intensaun diak ne'e. Nina maski ho laran todan susar atu simu ida ne'e maibe nia mos laiha kbiit atu kontra nia inan ne'ebe tau matan tomak ona ba nia. Inan nia liafuan, diak ka aat mos, hanesan ona liafuan lulik.

Maski sente kanek Nina buka atu kontinua fali nia moris. Hafoin tinan tolu taka an ba domin tan fuan-kanek be nia esperensia ho Joel, Nina ikus mai hetan fali mane seluk ne'ebe bele manan fali nia fuan. Mane ne'e mak Abeto. 

***

Abeto, tia Joana nia mane-foun boot. Mane-foun ne'ebe nunka hetan hakuak iha loron boot ka hetan parabeens ba nia tinan desde nia tama familia Marques. Husi inisiu, Nina hateten ona Abeto oinsa familia Marques nia espetasaun ba ninia mane-foun sira. Maibe Abeto lori fiar-an mak mai. Abeto badinas serbisu maski salariu natoon, nia haraik an, nia sempre prezente wainhira iha lia ruma no la haluha atu fo kontribuisaun maski nia tenki debe tuun sa'e. 

Infelizmente, ba nia banin-feto Joana Marques, buat hirak ne'e seidauk to'o atu prova katak Abeto mak mane-foun familia Marques ne'ebe nia bele elojia, gaba no hatudu ba nia familia sira nudar mane-foun diak-liu. Nina hatene momos nia inan nia espetasaun ba Abeto be aas tebes. Maibe agora Abeto harahun  tan senhora Joana nia espetasaun atu iha mane-foun diak nebe bele halo nia orgulhu. Nina hatene momos tansa Abeto lanu nune'e. La'os Abeto nia salan tomak se nia espressa nia hirus liuhusi lanu tan ninia prezensa la hetan apresiasaun sinseru husi ninia banin-feto. Mane-foun ida ne'ebe mak fuan la moras se wainhira loron boot nia mai vizita, nia banin hatudu oin laliga nia hanesan nia ne'e laiha ne'eba? 

Abeto nebe nia kuinese mak mane ida ne'ebe estima tebes nia, la hare'e ba nia pasadu ne'ebe nakukun no hakarak de'it atu hala'o futuru to'o mate ho Nina. Abeto mak mane ida ne'ebe konsege halo Nina bele loke fali nia an np hetan fali ninia fiar-an hafoin tinan rua nia taka-an  tan senti katak ba nia laiha ona esperansa atu hadomi eh hetan domin ba futuru ne'ebe diak. 

Abeto mak ho ninia esforsu tomak hamriik defende no satan Nina wainhira ema hotu fihir nia ho matan sorin. Wainhira ema hotu hateten husi ibun ba ibun katak Nina la merese ona atu ema hadomi tan maibe Abeto ho fiar boot konvense nia hodi konsege lori sira rua hakotu juramento domin iha altar igreja nia oin. Oras ne'e Nina so bele tuur tanis nonok hodi fo sala nia an tamba iha momentu hanesan ne'e nia la bele defende Abeto. Mane ida ne'ebe hadomi tebes nia.

***