Barbados Lily (Hippeastrum puniceum): Aifunan Novembro ne'ebe ha'u kuinese iha Lospalos


Barbados Lily (Hippeastrum puniceum)

Hippeastrum puniceum kuiñesidu ho naran Barbados Lily nudar aifunan murak ida husi jéneru (genus) botániku Hippeastrum ne'ebé pertense ba família Amaryllidaceae (Português: Amarilidaceas). Aihoris husi família ida-ne'e nia lalaok mak hare'e ba hanesan duut-tahan-naruk ho tahan hanesan ho surik (herbacea), moris ho tempu naruk bele to'o tinan (perenial) no iha  abut ho isin bubu-boot hanesan liis  isin (bulbo).  

Pintura Amarylis reginae husi pintor Franses Pierre-Joseph Redouté (1802-16)

Naran Amaryllis rasik foti husi naran karatér bibi-atan-feto ida iha poeta Romano Virgílio nia poezia 'Eclogues' maibe mos foti husi liafuan Igregu ἀμαρύσσω (amarysso). Iha fonte seluk, sei liga mos ho mitu Igregu ne'ebe haktuir katak Amaryllis mak  nimfa (feto-ran ne'ebe bele nakfilak ba animal ruma) moedór ida ne'ebé gosta tebe-tebes bibiatan-mane ida naran Alteo, mane ne'e iha oin-bonitu no isin-forte maibe nia la simu hikas Amaryllis nia domin. Amaryllis sente laran-moras tebes no nia husu konselu ba matan-dook husi Delphi. Ho konselu ne'e, Amaryllis tuir mai hatais bistidu mutin ba mosu iha Alteo nia odamatan loro-loron hodi sona nia fuan ho rama osan-mean durante loron tolunulu tuituir malu. To'o ikus, wainhira Alteo loke hikas odamatan, Amaryllis nakfilak tiha ona sai aifunan ida ho kor mean lakan hanesan kor raan be mean lakan sulin husi Amaryllis nia fuan-book nudar simbolu orgulhu ba domin ne'ebe nia rai ba Alteo. Ho mitu ne'e mak halo aifunan Amaryllis sai nudar simbolu orgulhu, determinasaun nomos kmanek murak. Naran Amaryllis mos liga ho liafuan 'amarella' katak 'moruk' tanba sabor husi aifunan ne'e nia abut-isin be moruk la halimar.

Pintura Amaryllis iha mitu Igregu

Iha tinan 1753, taxonomia (siénsia ba identifikasaun no klasifikasaun aihoris) ba aifunan ida-ne'e halo husi Carl Linnaeus, botanista, zoolojista no médiku Sueco ida ne'ebe famozu ho ninia titulu nudar 'aman ba taxonomia modernu'. Taxonomia ne'ebé nia halo inklui espésie sira aifunan ida-ne'e nudar grupu Amaryllis wainhira nia kria naran ba espesie aifunan Amaryllis ida ho kor roza-naroman naran Amaryllis belladona.  Tempu ne'e, jéneru aifunan ho tipu hanesan eziste mos iha Áfrika Sul no Amérika Sul no ikus hamosu fali konfuzaun entre botanista sira atu distingi jéneru espésie loloos husi nasaun rua ne'e tan iha variasaun oioin ba aifunan ida-ne'e maski haree ba atu hanesan.

Amaryllis Belladona
Iha tinan 1819,  serbisu haketak jéneru aifunan Amaryllis hahú no William Herbert, botanista, ilustrador, poeta no amlulik Inglaterra ida kontribui makaas ba serbisu ida-ne'e hodi identifika espésie aifunan 14 hodi fo naran Hippeastrum ba grupu jeneru aifunan hirak ne'e hodi haketak sira husi grupu jéneru Amaryllis iha tinan 1821. Naran Hippeastrum ne'e rasik Herbert foti husi liafuan Igregu Antigu ἱππεύς (Hippeus) katak asswain-foho no ἄστρον (Astron) katak fitun. Nune'e naran Hippeastrum katak asswain-fitun ka aifunan asswain-fitun, karik tamba aifunan ne'e nia funan be atu hanesan fitun. Grupu jeneru Hippeastrum oras ne'e botanista sira identifika ona iha espésie 90 resin. Maski nune'e mos, ema barak nafatin konfunde atu distingi espesie husi Amaryllis no Hippeastrum.


William Herbert

Iha Timor-Leste, dalaruma iha espésie jéneru Amaryllis no Hippeastrum oioin maibe espésie Hippeastrum ne'ebé hau hatene ba dala-uluk liu mak Barbados Lily (Hippeastrum puniceum) wainhira ba iha Lospalos. Espesie aifunan ida-ne'e buras ho diak tebes iha tempu malirin, wainhira tempu udan atu hahú, hanesan iha fulan Novembru ba oin. Wainhira sei kiik, tamba sempre haree aifunan ne'e mosu iha fulan Novembru, ami sempre hanaran aifunan ida-ne'e Aifunan Novembro (Bunga November) nudar sinal katak tempu udan to'o dadaun ona. Aifunan ida ne'e bele moris rasik hodi rai-subar ninia abut-isin (bulbo) iha tempu bailoron no buras hikas fali hodi hamosu nia funan iha tempu udan hanesan surpreza ba festa ida. Ho ninia kor-sabraka ne'ebe lakan, halo nia sai opsaun aihoris dekorativu ida ne'ebé kapás liu atu halo estrada ninin ka jardin sira sai furak iha matan wainhira aifunan ne'e buras maski iha tempu balun de'it.

To'o ohin loron, ha'u sempre sente nostáljiku wainhira haree hetan Barbados Lily funan iha fatin ruma maski ihun ida de'it. Ha'u iha mehi mós atu bele kuda aifunan ne'e iha jardin uma-huun ka halo nia sai prezente ba ema ruma atu kuda fali. Alende iha Lospalos, ita bele hetan mos aifunan ne'e moris buras tuir estrada ninin sira ka iha jardin uma-huun  ida-idak iha Suco Bucoli no Triloka (Baucau), Maubisse no fatin sira seluk ne'ebé iha klima malirin no dalaruma mos iha jardin balun iha sidade Dili nia laran wainhira tempu udan tau no rai malirin uituan.

Jardin Amaryllis iha Gunungkidul, Yogyakarta, Indonesia.

Ho potensia ida-ne'e, jardin aifunan lokal ida lokaliza iha Gunungkidul, provinsia Yogyakarta, (Indonesia) kuda aifunan ida-ne'e hakonu area jardin hodi hamosu vista furak ba ninia vizitor sira no sai mos nudar fatin turismu floral ida, wainhira aifunan ne'e hahú funan iha tempu hanesan husi rohan ba rohan kintu kantu  hakonu jardin ho kor-sabraka hanesan ahi-lakan.

Iha Timor-Leste rasik, aifunan ne'e sei moris de'it nudar aifunan fuik ne'ebé buras temporariamente no seidauk sai hanesan aifunan ne'ebé hetan atensaun espesial atu bele haburas ba utilizasaun komersial ka estetikal ruma. Karik mak aifunan ne'e hahu hetan atensaun husi setor relevante, dalaruma Timor-Leste mos bele iha tan jardin Amaryllis/Hippeastrum iha fatin balun atu ita ba vizita hodi hasai foto selfie no sente goza furak natureza. 

VZ (Ema ne'ebe gosta fihir Barbados Lily buras iha Lospalos waiinhira sei kiik). 

Fonte:
https://en.wikipedia.org/wiki/Amaryllis
https://en.wikipedia.org/wiki/Hippeastrum#Etymology
https://www.teleflora.com/meaning-of-flowers/amaryllis
https://en.wikipedia.org/wiki/Hippeastrum_puniceum
https://royalcolors.com/blog/the-history-the-amaryllis-flower/
https://www.donaldheald.com/pages/books/3882/pierre-joseph-redoute/amaryllis-reginae-amaryllis-de-la-reine-mexican-lily-queens-horse-star
https://jogja.tribunnews.com/2017/07/19/keindahan-taman-bunga-amaryllis-bisa-dinikmati-lagi-november-mendatang


Komentar

Posting Komentar

Postingan populer dari blog ini

Aprende husi Sócrates: Ta’es Dala Tolu

Gambar
Sócrates mak ema matenek-nain ida husi Igregu. Nia ema ida be naran boot tamba ninia kuinesementu no sabedoria ne’ebe klean.  Loron ida, iha mane ida mai hasoru malu ho Sócrates no hateten,  “Itaboot hakarak hatene saida mak ha’u foin rona konaba itaboot nia belun ida?’’ “Hein lai,” Sócrates hatán.   “Molok itaboot fo hatene ha’u konaba buat ruma, ha’u hakarak itaboot passa lai ezame kiikoan ida. Ezame ne’e hanaran Ta'es Dala Tolu. ” “Taes Dala Tolu?” Mane ne’e husu. “Loos,” Sócrates hatán.  “Molok itaboot hateten mai ha'u konaba ha’u nia belun, karik diak liu fó tempu uituan hodi ta’es lai buat ne’ebé itaboot atu hateten. Ida ne’e ha’u bolu dehan ezame ta’es dala tolu. Ta’es dahuluk nian mak LIALOOS . Itaboot garante ona katak buat ne’ebe itaboot atu hateten mai ha’u ne’e loos?" “Lae” mane ne’e hatán, “loloos ne’e ha’u foin mak rona no hakarak atu fo hatene ba ita.” “Diak,” Sócrates hatan.  “Se nune’e
Baca selengkapnya

KONABA DOMIN

Gambar
Obra Kahlil Gibran husi Livru O Profeta   Tradusaun livre ba lian Tetum husi Vitalia Ze Hafoin,   Al-Mithra hateten: Koalia to’ok mai ami konaba domin. No nia fila oin hodi hateke ba povu hotu iha ne’ebá be mohu iha nonook nia laran. Nune’e, ho lian makaas, nia hateten: Wainhira domin fo bodik hodi bolu o, tuir nia ba, maski ninia dalan sira mesak toos no   kroat. No wainhira ninia liras sira hakuak o, entrega o nia an ba nia, maski surik ne’ebe naksubar iha ninia liras leet   bele hakanek o. No wainhira nia koalia ba o, fiar ba nia, maski ninia lian bele harahun o nia mehi sira nudar anin tasi-feto be sobu-rahun jardiin. Nudar domin sei tau koroa ba o,   nune’e mos mak nia sei krusifika o. Nomós, nudar nia bele haburas o, nia mos bele hamenus o.   No nudar nia bele harii-an aas hanesan ho o no book o nia sanak sira be mamar   liu ne’ebe nakdedar iha Loro-matan okos, sei sai nune’e mos mak nia dada-tuun   o nia abut sira be metin i
Baca selengkapnya

Domin no Diferensa

Gambar
Wainhira sei eskola, ha’u iha belun mane no feto ida ne’ebe laran monu ba malu no hahu sira nia relasaun domin iha tinan dahuluk eskola nian. Maski   nune’e, sira nia relasaun   hasoru diferensa iha ida-idak nia tinan, hahalok no hanoin hodi halo sira dalaruma hirus malu no kuaze atu fahe malu. Belun feto ne’e dalaruma senti laran nakraik nune’e iha tempu ruma nia fahe nia sentimentu ba ha’u nomos belun feto maluk seluk ne’ebe nia konfia atu hato’o nia problema.  Iha kalan ida, ha’u mehi   konaba nia no nia doben. Iha loron tuir mai, ha’u hasoru belun feto ne’e, ha’u haree katak nia la duun kontente tan ninia problema no sintimentu sira.  Ha’u konta tuir ba nia oinsa ha’u mehi haree nia no nia doben hirus malu makaas to ’o nia tanis senti la bele hodi sai konfuzaun lahatene atu halo oinsa loos. Iha mehi ha’u hakbesik nia hodi dehan: ‘’Belun, iha mundu ne’e, laiha mane ne’ebe perfeitu maibe sei iha domin ne’ebe perfeitu….”. Ha’u ho ha’u nia belun sai bilaan ba momentu
Baca selengkapnya