Ambaun, Leitura no Lian Fataluku iha Igreja Katólika Parókia São Paulo Lospalos





Iha tinan 2001 resin, tuir missa iha Igreja Katólika Parókia São Paulo Lospalos sempre uza lian Fataluku ba leitura introdusaun durante missa. Buat ne’ebé uniku tebes bele rona lian Tetun no lian Fataluku akompanha malu wainhira missa hahu to'o remata. Ema ne’ebé lee testu introdusaun ne'e sei hakat sa'e ba altar leten hodi hamriik iha ambaun oin no lee testu ne'e. Altar ne'e tamba harii aas entaun haree ba atu hanesan fali palku ida. Ha'u gosta tuir missa iha igreja ne’e dalaruma mos tamba parte úniku ida-ne'e.


Lee leitura iha missa tempu ne'e sai hanesan atividade ida ne’ebé 'sadik' tebes ba sira ne’ebé tauk atu hare'e ema barak iha públiku. Ba sira ne’ebé toman ona ne'e atividade furak ida bele lee mensajen husi biblia ba ema hotu iha missa laran. Buat ne’ebé ema leitor ba leitura buka atu hasees an tebebes mak atu labele lee sala testu iha leitura tamba ema hotu sei konfundi no hamnasa no dalaruma padre ne’ebé reza missa mos bele siak tan. Maibe failansu durante lee leitura kontinua akontese. Iha missa ba foinsa'e sira, bele akontese ema lee lalais liu, neneik liu ka lee ho pontuasaun ka entonasaun lee mak ladun loos. Dala ida akontese leitor ida atu lee leitura mak buka fali pájina leitura ne'e iha livru liturjia kuaze demora tiha minutu lima no kosar sulin tamba pájina ne’ebé nia atu lee laiha marka. Hau bele nota oinsá nia nakdedar iha ambaun leten tamba pániku lahatene oinsá bele hetan fali pájina refere enkuantu sarani sira tuur iha kraik hein hela atu rona leitura dahuluk nian. Sorte iha akolitus ne’ebé mai ajuda kedas no hetan lalais pájina refere. Maski nune'e mos, failansu ne'e nafatin sai memória komik no lisaun ba ema seluk atu la repete tan.


Dala balun ona ha'u lee leitura ho lian Tetun maibé loron ida ha'u simu knar atu lee testu introdusaun/komentáriu ho lian Fataluku. Maski ha'u nia maneira ko'alia Fataluku la perfeitu liu, ha'u simu duni knar ne'e no koko lee testu ne'e fila ba fila mai ho entonasaun loloos hasara Fataluku oan sira ne’ebé ha’u rona ona oinsá sira lee. Ha'u espera ha'u bele lee ho diak maski ha'u mos tauk ha'u bele lee sala.

To'o loron missa nian, ha'u lee duni testu lian Fataluku ida-ne'e iha ambaun leten. Ha'u sente nakdedar, kontente hanesan anin dadulas iha ha'u-nia fuan. Ha'u lee to'o hotu. Dalaruma koko hateke liu ba sarani sira be tuur iha kraik maski ha’u sente la preokupa tan sira. Oinsá sira nia reazen? Ha'u la dekor tan sira nia oin. Ha'u sente de'it mak ha'u nia prezensa no testu ne'e lian iha mikrofone, dere ba ha'u nia tilun no koalia mai ha’u. Liafuan ba liafuan to'o hotu. Wainhira missa sai, kolega Fataluku oan ida mai besik ha'u no fo komentáriu katak ha'u-nia entonasaun lian Fataluku ohin la perfeitu. Ha'u hamnasa. Nia mos hamnasa. Desde husi ne'e ha'u haluha ona, dala hira mak ha'u lee tan testu introdusaun lian Fataluku ne'e iha missa. Ha'u ba nafatin missa maibé la lee ona leitura bebeik. Ha'u troka fali knar sai rona-nain leitura de'it.


Ohin loron, ambaun ne'e sei nafatin eziste iha Igreja Katólika Parókia São Paulo Lospalos. Missa kontinua hala’o maibé leitura ho testu Fataluku ba parte introdusaun ne'e troka fali ona ba lian Tetun. Laiha ona lian Fataluku durante missa hanesan tempu uluk maibe failansu lee leitura kontinua akontese. Ha'u nafatin tur missa iha igreja ne'e maski la úniku ona ho prezensa lian Fataluku hanesan uluk. Ohin loron, iha igreja ne'e, grupu koru sira sei hananu kántiku missa sira iha lian Tetun, Portugués, Inglés, Español no lian Indonézia.


VZ, Dec 2019

Komentar

Posting Komentar

Postingan populer dari blog ini

Aprende husi Sócrates: Ta’es Dala Tolu

Gambar
Sócrates mak ema matenek-nain ida husi Igregu. Nia ema ida be naran boot tamba ninia kuinesementu no sabedoria ne’ebe klean.  Loron ida, iha mane ida mai hasoru malu ho Sócrates no hateten,  “Itaboot hakarak hatene saida mak ha’u foin rona konaba itaboot nia belun ida?’’ “Hein lai,” Sócrates hatán.   “Molok itaboot fo hatene ha’u konaba buat ruma, ha’u hakarak itaboot passa lai ezame kiikoan ida. Ezame ne’e hanaran Ta'es Dala Tolu. ” “Taes Dala Tolu?” Mane ne’e husu. “Loos,” Sócrates hatán.  “Molok itaboot hateten mai ha'u konaba ha’u nia belun, karik diak liu fó tempu uituan hodi ta’es lai buat ne’ebé itaboot atu hateten. Ida ne’e ha’u bolu dehan ezame ta’es dala tolu. Ta’es dahuluk nian mak LIALOOS . Itaboot garante ona katak buat ne’ebe itaboot atu hateten mai ha’u ne’e loos?" “Lae” mane ne’e hatán, “loloos ne’e ha’u foin mak rona no hakarak atu fo hatene ba ita.” “Diak,” Sócrates hatan.  “Se nune’e
Baca selengkapnya

KONABA DOMIN

Gambar
Obra Kahlil Gibran husi Livru O Profeta   Tradusaun livre ba lian Tetum husi Vitalia Ze Hafoin,   Al-Mithra hateten: Koalia to’ok mai ami konaba domin. No nia fila oin hodi hateke ba povu hotu iha ne’ebá be mohu iha nonook nia laran. Nune’e, ho lian makaas, nia hateten: Wainhira domin fo bodik hodi bolu o, tuir nia ba, maski ninia dalan sira mesak toos no   kroat. No wainhira ninia liras sira hakuak o, entrega o nia an ba nia, maski surik ne’ebe naksubar iha ninia liras leet   bele hakanek o. No wainhira nia koalia ba o, fiar ba nia, maski ninia lian bele harahun o nia mehi sira nudar anin tasi-feto be sobu-rahun jardiin. Nudar domin sei tau koroa ba o,   nune’e mos mak nia sei krusifika o. Nomós, nudar nia bele haburas o, nia mos bele hamenus o.   No nudar nia bele harii-an aas hanesan ho o no book o nia sanak sira be mamar   liu ne’ebe nakdedar iha Loro-matan okos, sei sai nune’e mos mak nia dada-tuun   o nia abut sira be metin i
Baca selengkapnya

Domin no Diferensa

Gambar
Wainhira sei eskola, ha’u iha belun mane no feto ida ne’ebe laran monu ba malu no hahu sira nia relasaun domin iha tinan dahuluk eskola nian. Maski   nune’e, sira nia relasaun   hasoru diferensa iha ida-idak nia tinan, hahalok no hanoin hodi halo sira dalaruma hirus malu no kuaze atu fahe malu. Belun feto ne’e dalaruma senti laran nakraik nune’e iha tempu ruma nia fahe nia sentimentu ba ha’u nomos belun feto maluk seluk ne’ebe nia konfia atu hato’o nia problema.  Iha kalan ida, ha’u mehi   konaba nia no nia doben. Iha loron tuir mai, ha’u hasoru belun feto ne’e, ha’u haree katak nia la duun kontente tan ninia problema no sintimentu sira.  Ha’u konta tuir ba nia oinsa ha’u mehi haree nia no nia doben hirus malu makaas to ’o nia tanis senti la bele hodi sai konfuzaun lahatene atu halo oinsa loos. Iha mehi ha’u hakbesik nia hodi dehan: ‘’Belun, iha mundu ne’e, laiha mane ne’ebe perfeitu maibe sei iha domin ne’ebe perfeitu….”. Ha’u ho ha’u nia belun sai bilaan ba momentu
Baca selengkapnya