Galeria VZ

Nudar surat tahan mutin ida Ha'u mamuk hela Molok imi taka netik karimbu ida Loron ruma ha'u neon sei husu fila-fila Nudar ropa-mutin ne'e  Imi husu ha'u atu sai laran moos Iha moris ida hanesan ne'e  Oinsá mak ha'u sei komprende ho momoos ?  Nudar lilin be lakan Imi husu atu ha'u bele fó roman Iha neon wain be naktakan Karik esperansa ida bele hakmaan ?  Nudar bee malirin be habokon Imi husu ha'u hetan matak malirin Imi hanorin,  Nai sei haraik tulun tokon ba tokon Naran katak ha'u fiar hamriik metin hanesan airiin. Metinaro,  26/7/2020 Metinaro,  27/7/2020

Ita mesak labarik kiik de'it Wainhira bee lihun ne'e hasee ita ba dala uluk iha  knua ida be kiikoan maibe kmanek knua ida ho bee lihun boot ida Iha dadeer, meudia ka lorokraik mama fase ita-nia ropa foer sira iha ne'eba Nia matan been sulin hakonu bee lihun ne'e molok nia kuru hikas bee hodi haris ita fali haksoit tama be lihun ne'e, ho ksolok halo an hanesan ikan no manduku oan mak nani Baku liman no ain, ba oin no ba kotuk hamnasa no hakilar bee lihun furak! bee lihun furak! Ohin ita dook malun ona husi knua, husi mama, husi bee lihun bainhira tan mak ita bele hasoru malu tan iha bee lihun murak ne'e hodi hariis hamutuk nani hanesan ikan ka manduku haksolok no hakilar bee lihun furak! moris ne'e furak! Pairara (Moro/Lautem), Augustu 2013

Oh rai nakaras Iha o nia kortina ha'u subar ha'u nia todan Se mak bele hatene diak liutan laran susar ne'e liufali o Se mak bele kompreende neon sala ne'e di'ak liufali o Wainhira ha'u hateke o iha nonook O de'it mak hatene segredu hirak be tula hela iha kaba'as be ruin tohik dadaun ne'e.

Karik rai nakaras sei nafatin hanesan iha loron aban Karik hakat ne'e sei bele foti metru atus wain tan? Iha nakaras be hamohu ona koris sira Karik sei iha ita nain rua kaer liman nafatin hodi la'o hamutuk?

“Halo nusa? Aban imi atu ba tan Betano?”  Ana, ha’u-nia feen husu ha’u ho hateke kroat husi espelhu kuadradu be tara iha didin-lolon. Nia foin hariis no troka hotu ona wainhira ha’u tama mai kuartu laran no fó hatene nia kona-bá ha’u-nia viajen ne’e.  “Tansá mak ó mak tenki ba Aló? Funsionáriu seluk laiha ka?” Aná   hateten hodi nafatin hateke espelhu no sui nia fuuk be bokon. “Be laós ha’u mak bá entaun sé mak atu bá? Ema laiha hotu ne’e?” Ana hateke ha’u dada iis todan.  “Se ema laiha entaun hateten ba imi-nia xefi lalika ba tiha de’it. Kansela tiha atividade. Oras moras COVID la’o hela hanesan ne’e mak imi ba mai diak hela?”  “Eipah, Ana, dala hira ona ha’u dehan, ami ne’e laós hanesan imi serbisu iha NGO internasional be fasilidade kompletu imi serbisu husi uma. Oli-foer ne’e ema laiha atu tula, kompanhia be tula ne’e kontratu hotu ona seidauk renova. Governu be runguranga. Iha ha’u-nia serbisu fatin só ha’u deit mak toma konta tula buat ne’e. Agora ó koal

Air Bah Ha’u rona liafuan ne’e ba dala uluk husi aiknanoik ida foti husi biblia antigu testament durante aula Relijiaun Katólika. Aiknanoik ne’e ha’u-nia manorin feto  ema Atambua ida mak konta tuir wainhira ha’u sei kelas 2 SD. Nia mos pinta tuir fali aiknanoik ne’e ho jiz lolon mutin iha kuadru ai-kabelak metan ida no pinta hotu tiha ami alunus hare’e imajen sira ne’e hanesan tiha ho filme animasaun Mickey Mouse iha era 1930 sira ne’e. Kor  metan no mutin. Banjir Liafuan ne'e nafatin sai de’it hanesan imajinasaun wainhira ha’u aprende lee no kompreende liafuan ne’e nia vizual husi ilustrasaun ida iha livru lisaun Bahasa Indonesia klasse III SD. Ilustrasaun  ne’e pinta ho formatu vignete kor metan no mutin. Ha’u hanoin liafuan banjir ne’e mos nia koor metan ho mutin iha realidade hanesan liafuan air bah ne’ebé manorin feto ema Atambua ne’e pinta iha kuadru. To’o wainhira ha’u ba tuir doutrina premeiru komunhaun nian mak ha’u foin hatene katak ‘air bah’ no ‘banjir’ ne’e la

Oras tuku sanulu dadeer wainhira ha'u to'o iha Terminal Becora ho taxi. Ha'u-nia oan feto Cátia kaer metin ha'u-nia liman la'o tuir ha'u.  Bis sira ne'ebé atu ba Baucau para tuituir malu hela hodi hein passajeiru. Ha'u ko'us Cátia tara ho ami rua nia pasta iha kabas la'o lalais ba bis ne'ebè para uluk liu ho naran Liliara. Bis ida ne'e mak hein de'it atu sai tamba kadeira sira kuaze ema okupa ona.  Ne'e sistema foun ne'ebé kondutor bis hirak ne'e halo atu hamenus konjak hadau malu passajeiru. Molok ne'e bis Baucau nia konjak sira gosta atu hadau passajeiru wainhira haree hetan deit sira husi ponte Becora maibé ikus ne'e sira la halo ona nune'e. Bis hirak ne'e ko'alia tuir malu ona atu tula passajeiru tuir sé mak mai para uluk liu iha oin besik estrada boot.  Wainhira passajeiru nakonu ona bis ne'e mak sai uluk no bis ne'ebé para tuir nia mak sei tula fali passajeiru sira mai ikus ne'