Korespondensia no ninia Importansia

 

"Scripta Manent Verba Volant"

(Buat ne'ebe hakerek sei hela, buat ne'ebe koalia sei lakon)

Iha serbisu eskritorial entre organizasaun  ida ne’ebe serbisu hamutuk ho organizasaun seluk, buat ida ‘korespondensia’ ne’e importante tebe-tebes.

Korespondensia tantu husi haruka karta ba malu hanesan karta official, email, memo, minutas, notifikasaun,  pedidu , despaixu, ordem ka kontratu ne’e presiza fornese atu sai hanesan justifikasaun  no evidensia eskrita no konkreta ba parte rua molok eh durante ezerse sira nia desizaun ba aksaun ruma.

Maski pessoal entre organizasaun dalaruma konkorda ona desizaun sira liuhusi diskusaun verbal no dalaruma tamba razaun  compete ho tempu  nafatin korespondensia labele falta nia prezensa atu grava desizaun hirak ne’e.  Tansa nune’e?

Iha loron ikus, wainhira akontese inspeksaun, audit ka monitoring ruma husi orgaun kompetente, ema husi orgaun hirak ne’e sei la husu ita hamriik ka tuur iha iha ne’ebe mak koalia. Ema mai husu mak korespondensia hirak ne’e iha ne’ebe, verifika konteudu korespondensia hodi kompara ho lalaok rezultadu aksaun real ne’ebe hala’o tiha ona. Hafoin nune’e, mak sei hasai rezultadu monitoring, audit ka inspeksaun ba buat ne’ebe ita hala’o tiha ona.

Maski nune’e durante hala’o programa, dalaruma pessoal sira balun la tau atensaun didiak atu mantein korespondensia ho kompletu ho razaun balun ne’ebe bele relevante ou la relevante. Ohin loron akontese katak publiku smepre lamenta iha media sosial konaba problema dezentendimentu ho instituisaun governu ka privadu ne’ebe halo onegosiu ruma ho sira tan falta dokumentus ne’ebe loloos parte balun bele prevene husi inisiu.

Ikus mai kuandu iha prejudikasaun ruma mak foin hakfodak buka tuun sa’e ka duun tuun sa’e ne’ebe loloos buat hirak bele prevene antes. Sorte diak karik, ne’e bele resolve ho rezolusaun husi parte kompetente maibe kaundu diskrepansia ne’e lei ka akordu internal la fo dalan atu resolve bele rezulta sakrifika ema balun liuhusi sansaun ruma hanesan kua salariu, suspensaun eh hasai husi serbisu. Karik monu ba ema ruma ne’ebe bele kontinua moris sem problema laiha buat ida maibe karik mak monu ba ema ne’ebe susar atu buka serbisu seluk kuitadu ita hasusar ema nia moris tomak tan de’it buat kiik-oan ida.  Problema tamba falta korespondensia bele husik hela konsekuensia boot ba ema balun no prejudika mos ema nia serbisu tantu iha nivel organizasaun no ka personnel.

Tan ne’e, sai importante tebes atu mantein ‘korespondensia’ kompletu ne’ebe rekere iha serbisu. Buat ne’ebe bele halo atu mantein korspondensia mak tenki mantein komunikasaun ne’ebe regular no klaru no grava pontu importante husi komunikasaun hirak ne’e iha dokumentu eskrita no rai didiak kopia dokumentus sira ho didiak. Wainhira iha ona mudansa ruma liuhusi komunikasaun verbal diak liu dokumenta kedas iha eskrita. Tan wainhira la dokumenta didiak mak sei sai problema iha loron ikus.VZ