AAA Ballon - Balaun-been hodi Huu Halimar ba Labarik iha tempu 1990


 
 
Tempu 1990 mak tempu ne'ebe nakonu nostaljia ba jerasaun labarik sira husi tempu ne'e. Nudar labarik ne'ebe konsege moris iha tempu ne'eba, ha'u-nia memoria furak ida iha tempu ne'e mak kona-ba brinkedu/sasan-halimar ba labarik sira be mesak simples tebetebes no la dijitaliza ka avansadu hanesan tempu ohin loron, era 2000 ka millenial. 

Koalia kona-ba brinkedu ba labarik iha tempu 1990, iha duni brinkedu oioin ba labarik feto no mane atu bele haimar haksolok iha tempu livre. Brinkedu hirak ne'e balun bele halo rasik no balun mos tenke sosa. Ba brnkedu ne'ebe sosa, iha brinkedu ida ne'ebe ha'u sei hanoin kona mak brinkedu balaun-been ho marka AAA. Brinkedu ida-ne'e halo husi material hanesan plastiku-been no wainhira kaer atu hanesan ho goma-been maibe la belit no tau iha tubu ida hanesan pasta-dente fatin. Medida tubu ne'e kiikoan loos hanesan liman-fuan-kiik. 
 

Lalaok atu halimar brinkedu ne'e mak uluk nanain tenke loke tubu hodi halo ku'ak uituan iha tubu nia tutun, buti sai balaun-been ne'e uituan de'it hodi tau ba iha ninia lolon-plastiku ida hanesan palha/sedotan mak foin tau ba iha ibun hodi huu. Balaun-been ne'e sei forma hanesan balaun boot transparante ida ne'ebe bele aguenta ba segundu balun. Balaun-been ne'e mos wainhira huu sai bele forma kabuar, naruk ka oval konforme ita huu. Bele mos huu tiha balaun ne'e mak halo fera halimar hodi rona nia lian tarutu hanesan batar sona no hamnasa goza malun ho kontente ho de'it halimar simples ida-ne'e. 
 
Dalaruma ami labarik halimar taru huu balaun-been ne'e. Se mak huu balaun boot liu ka se mak nia balaun bele aguenta to'o kleur liu molok nakfera mak sai nudar manan-nain. Buat uniku seluk husi balaun ne'e mak ita bele tau tutan balaun ne'ebe ita huu ho balun seluk ne'ebe kolega huu ona hodi halo hanesan bola-belit-malun. Ami dalaruma fo naran ba ami ida-daik nia balaun finji katak balaun ne'e monstru ida no uza balaun ne'e hodi duni malun iha aredores eskola nian molok tama aula.

Balaun ne'e iha tempu ne'eba vendedor-ambulante sira faan rahun de'it hodi fahe tubu ida ho folin Rupiah 50 ka ekivalente ho Dollar 0.05. Ho valor ne'e mak iha labarik barak mak sempre gosta husu osan husi inan-aman ho montante Rupiah 100 wainhira ba eskola tamba de'it atu sosa balaun ne'e. Valor divertimentu husi balaun ne'e kria duni valor ekonomiku. Ho labarik kiikoan sira nudar konsumidores prinsipal ba brinkedu ne'e, vendedor/makfaan sasan brinkedu mos sempre buka dalan oinsa bele hakbesik an lalais ba sira-nia alvu merkadu ne'e. Tamba ne'e mak iha eskola-primaria (uluk bolu Sekolah Dasar/SD iha tempu Indonezia) sira iha tempu ne'eba, vendedor brinkedu sira sempre mai faan sira-nia sasan iha area eskola nia-sikun sira. Vendedor sira ne'e mai kedas iha dader tuku hitu, minutu tolunulu molok estudante sira tama eskola. Iha minutu hirak ne'e alunus barak mak iha ona eskola molok aula hahu. Durante oras aula nian, alunus sira sei tama aula no tuir aula maibe vendedor hirak ne'e sei mantein nafatin sira-nia pozisaun hodi prontu hein estudante sira ne'e to'o oras rekreiu no oras fila uman nian. Se sira-nia sasan hotu sedu mak sira foin fila uluk.
 
Ohin loron, ha'u ladun hatene karik balaun ne'e sei faan iha Timor laran ka lae maibe iha Indonezia balaun ne'e ne'e faan barak iha loja brinkedu ba labarik ka kioske kiikoan sira. Balaun ne'e mos iha marka seluk ho naran Bestman ballon produz husi fabrika PT Batman Kencana iha Jakarta Indonesia. Balaun ne'e ohin loron nafatin sai brinkedu ba labarik no balun gosta sosa atu fahe ba labarik sira iha festa ka funsaun festival ruma.


 
 Dili, 12 Setembru 2020
VZ

Komentar

Posting Komentar

Postingan populer dari blog ini

Aprende husi Sócrates: Ta’es Dala Tolu

Gambar
Sócrates mak ema matenek-nain ida husi Igregu. Nia ema ida be naran boot tamba ninia kuinesementu no sabedoria ne’ebe klean.  Loron ida, iha mane ida mai hasoru malu ho Sócrates no hateten,  “Itaboot hakarak hatene saida mak ha’u foin rona konaba itaboot nia belun ida?’’ “Hein lai,” Sócrates hatán.   “Molok itaboot fo hatene ha’u konaba buat ruma, ha’u hakarak itaboot passa lai ezame kiikoan ida. Ezame ne’e hanaran Ta'es Dala Tolu. ” “Taes Dala Tolu?” Mane ne’e husu. “Loos,” Sócrates hatán.  “Molok itaboot hateten mai ha'u konaba ha’u nia belun, karik diak liu fó tempu uituan hodi ta’es lai buat ne’ebé itaboot atu hateten. Ida ne’e ha’u bolu dehan ezame ta’es dala tolu. Ta’es dahuluk nian mak LIALOOS . Itaboot garante ona katak buat ne’ebe itaboot atu hateten mai ha’u ne’e loos?" “Lae” mane ne’e hatán, “loloos ne’e ha’u foin mak rona no hakarak atu fo hatene ba ita.” “Diak,” Sócrates hatan.  “Se nune’e
Baca selengkapnya

KONABA DOMIN

Gambar
Obra Kahlil Gibran husi Livru O Profeta   Tradusaun livre ba lian Tetum husi Vitalia Ze Hafoin,   Al-Mithra hateten: Koalia to’ok mai ami konaba domin. No nia fila oin hodi hateke ba povu hotu iha ne’ebá be mohu iha nonook nia laran. Nune’e, ho lian makaas, nia hateten: Wainhira domin fo bodik hodi bolu o, tuir nia ba, maski ninia dalan sira mesak toos no   kroat. No wainhira ninia liras sira hakuak o, entrega o nia an ba nia, maski surik ne’ebe naksubar iha ninia liras leet   bele hakanek o. No wainhira nia koalia ba o, fiar ba nia, maski ninia lian bele harahun o nia mehi sira nudar anin tasi-feto be sobu-rahun jardiin. Nudar domin sei tau koroa ba o,   nune’e mos mak nia sei krusifika o. Nomós, nudar nia bele haburas o, nia mos bele hamenus o.   No nudar nia bele harii-an aas hanesan ho o no book o nia sanak sira be mamar   liu ne’ebe nakdedar iha Loro-matan okos, sei sai nune’e mos mak nia dada-tuun   o nia abut sira be metin i
Baca selengkapnya

Domin no Diferensa

Gambar
Wainhira sei eskola, ha’u iha belun mane no feto ida ne’ebe laran monu ba malu no hahu sira nia relasaun domin iha tinan dahuluk eskola nian. Maski   nune’e, sira nia relasaun   hasoru diferensa iha ida-idak nia tinan, hahalok no hanoin hodi halo sira dalaruma hirus malu no kuaze atu fahe malu. Belun feto ne’e dalaruma senti laran nakraik nune’e iha tempu ruma nia fahe nia sentimentu ba ha’u nomos belun feto maluk seluk ne’ebe nia konfia atu hato’o nia problema.  Iha kalan ida, ha’u mehi   konaba nia no nia doben. Iha loron tuir mai, ha’u hasoru belun feto ne’e, ha’u haree katak nia la duun kontente tan ninia problema no sintimentu sira.  Ha’u konta tuir ba nia oinsa ha’u mehi haree nia no nia doben hirus malu makaas to ’o nia tanis senti la bele hodi sai konfuzaun lahatene atu halo oinsa loos. Iha mehi ha’u hakbesik nia hodi dehan: ‘’Belun, iha mundu ne’e, laiha mane ne’ebe perfeitu maibe sei iha domin ne’ebe perfeitu….”. Ha’u ho ha’u nia belun sai bilaan ba momentu
Baca selengkapnya