GIRLS TRIP: OINSÁ GRUPU AMIZADE FETO TANE FETO MALUK.
 |
| Sena ida iha filme Girls Trip. Foto: Glamour.com |
Girls
trip mak filme komédia estadunidense lansa iha tinan 201, diriji no hakerek husi Malcolm D. Lee, Kenya
Barris no Tracy Oliver, no produz husi Universal Studios. Estrelas ka elencos
prinsipal sira iha filme ida-ne’e mak maioria atriz metan popular sira hanesan
Regina Hall (atriz no komediante), Queen Latifah (atriz, produtora múzika,
kantora Rap), Jada Pinkett Smith (atriz no kantora) no Tiffany Haddish (atriz
no komediante). Fofoun hare’e hetan filme ne’e nia trailer, ha’u siik filme
ne’e dalaruma sei sai hanesan filme Desperate Housewives versaun metan ho
temperus kómiku ala malae metan ne’ebé furak atu anima tempu livre. Hafoin
hare’e tiha filme ida-ne’e husi DVD, ha’u nia siik ne’e sala tiha. Filme ne’e
la’os de’it filme komédia barratu.
Inísiu
husi filme ida-ne’e haktuir husi Ryan (Hall) ne’ebé konta tuir oinsá wainhira
nia sei klosan goza moris ho haksolok ho ninia belun diak feto maluk nain tolu
naran Sasha (Latifah), Lisa (Smith) no Dina (Haddish) wainhira sei sai estudante universitáriu.
Sira-nia grupu quartet belun diak ne’e mak naran Flossy Posse. Membru Flossy
Posse popular iha universidade no ida-idak iha nia mehi rasik atu atinji. Sasha
hakarak sai jornalista, Lisa gosta ba festa hela de’it maibé iha fuan nakonu
domin, Dina gosta goza moris ransu livre ne’ebé risku no Ryan rasik mehi atu
iha moris prósperu no sai feto inspiradora. Amizade entre belun nain-haat ne’e buka
atu haksolok hamutuk no tane malun wainhira ida hetan problema. Ezemplu
wainhira Lisa sai husi tribunal hafoin divórsiu, nia belun nain tolu ne’e mak
fo apoiu moral hodi haboot nia fuan atu hamriik fali no la’o ba oin. Hafoin
ida-idak okupadu ho sira nia vida kareira no família, frekuensia komunikasaun
no halibur-malun entre sira mos menus dadaun to’o laiha liu.
Fenómena
menus-komunikasaun entre grupu amizade feto ida-ne’e fo hanoin fali ha’u no
karik ita feto ba tempu uluk sei eskola sekundária ka iha universtariu, ita ka kolega
kolega balun espressa ita an liuhusi forma grupu amizade ne’ebé popular no
promote atu tanen malun nafatin to’o fahe malun hafoin remata eskola. Ikus mai,
karik iha balun mak konsege hasoru malun nafatin hafoin remata eskola no harii
familia hodi kontinua fo apoiu ba malun. Maibé karik iha mos ita-nia grupu amizade
balun mak fahe malun namkari tamba razaun no okupasaun ida-idak.
Ohin
loron ho prezensa telfone no media sosial dalaruma bele ajuda hatutan no hakesi fila-fali talin amizade
ida-ne’e hodi hafasil komunikasaun maski virtual de’it. Maibe se ita observa
fali, ne’e mos rekere esforsu husi individu ida-idak nia komitmentu atu kontinua
mantein kontaktu no komunikasaun ba malun liuhusi plataforma virtual ne’e maski
kusta osan no enerjia. Biar nune’e ona mos, kontaktu direta entre ema ho ema nafatin sai nesesidade no
preferénsia iha amizade ida no ita ema nudar entidade sosial. Tan ne’e dalaruma
ita hetan ita nia an rasik ka ita-nia membru grupu amizade sira balun ativu
hodi koko nafatin fo sira nia tempu atu bele organiza reuni hodi hasoru malu
direta ho belun sira uluk.
Sena
tuir mai iha filme mak Ryan ne’ebé sai ona eskritora no konseleira relasaun
susesu ida hamutuk ho ninia laen Steward
ne’ebé mos eis atleta popular ida be influensia tebes. Ryan hetan oferese atu
sai orador prinsipal iha eventu Essence Festival Music iha New Orleans no nia
deside atu konvida mos nia belun diak nain tolu ne’e hodi hakarak passa tempu hamutuk
fali ho sira. Konvite ida-ne’e halo ninia kolega nain-tolu sente surpreza no
kontente loos bele hamutuk hikas hodi hamoris fali sira nia bulak nudar grupu Flossy Posse hanesan
wainhira sei klosan. Iha parte ne’e mak ita sei hare’e oinsá Lee, Barris no
Oliver falun komplexidade feto nia moris ho konflitu oioin ho kómedia.
Tuir
referensia ne’ebé iha, istoria filme ne’e halo bazeia mos ba peskiza ba feto
kona-ba sira-nia problema en jeral iha Estadus Unidus antes atu produz. Fime ne'e hetan taxa review 90% husi Rotten Tomatoes. Karatér atríz metan sira ho sira-nia humor,
atetude no linguajen sira iha filme ne’e mos ku’u tilun, halo hakfodak no kedok
loos ita-nia kabun to’o hahaek makaas loos. Komik ida halo nusa? Depois mak hare'e rasik ba!
Plot
kontinua, ho reuni ida-ne’e mak Lisa, Dina no Sasha haktuir oinsá iha sira-nia idade
tolu-nulu resin ne’e, sira la konsege atinji sira-nia mehi hodi sai feto
sussesu hanesan Ryan. Sasha la sai jornalista maibe serbisu fali ba kompanhia
media rumor hodi loke website kona-ba rumor selebridade sira no manan osan uituan
hodi bele sustenta nia moris. Lisa hela hamutuk fali ho ninia inan no serbisu
nudar enfermeira hodi tau matan ba ninia oan nain rua desde divórsiu no lakohi
ona atu hola mane tan. Dina ema hasai husi serbisu-fatin tan hahalok agresssivu,
nia istori malu no ataka kolega mane ida
be foti ninia hahán iha jeleira. Ryan fali konta ba sira katak nia moris la’o diak
de’it maibé Sasha nota katak Ryan subar hela ninia problema husi sira nain tolu.
Ryan nia attitude taka falta ba sira nain-tolu ne’e mak sai sentru konflitu iha
filme ida-ne’e.
Sasha
rasik mak hetan fotografia Steward toba ho feto seluk ne’ebé paparazzi haruka
ba nia. Ho foto ida ne’e mak Sasha nia
kompanhia hakarak atu halekar ba media maibé Sasha laran-ruak hela. Ryan hare’e
tiha foto ne’e hateten katak nia diak hela no fiar katak nia laen sei muda nia
hahalok no sira sei hadomi malu nafatin to’o rohan. Ho ninia reputasaun nudar
konseleira kazamentu famozu, Ryan sente tauk atu halo buat ruma kona-ba Steward
ninia kazu kama-rua ne’e tamba sira-rua
kuinesidu nudar kazal ideal ne’ebé hadomi malun tebes iha sidade tomak no sira-rua
hetan kontratu ho osan-boot atu sai orador iha eventu tuir mai. Sasha preokupa
ho Ryan nia attitude taka falta no nota momoos katak Ryan frustradu hela atu
mantein imajen falsu ida-ne’e.
Klimax
mak Sasha fo hanoin makaas ba Ryan atu loke an hodi fó sai ba publiku kona-ba
ninia vida kazamentu loloos no katak nia la perfeitu hanesan buat ne’ebé Ryan
hakerek iha ninia livru títulu ‘You Can Have It All’ (o bele hetan buat hotu).
Ho ejijensia belun diak nain-tolu ne’e mak ikus mai Ryan loke an duni no
konfessa katak nia durante ne’e hatene hela Steward la kontente tamba sira
laiha oan no Ryan rasik konsulta ona iha hospital sira maibé hetan rezultadu katak
nia sei labele isin-rua tan problema iha ninia oan-fatin. Nia kolega sira
hakfodak no hirus tansá nia lakohi konta sai ba sira atu nune’e sira bele
hatene netik hodi fó apoiu moral ba nia. Iha ne’e mak Ryan realiza katak nia
rasik mak hadook an husi ninia belun diak sira ne’ebé sempre prontu atu tane
nia. Afinal mesa-mesak subar problema ba an rasik no taka falta ne’e ladiak. Ryan
aprende katak nia la bele hetan buat hotu (you can’t have it all).
Karik
situasaun ne’ebé Ryan enfrenta akontese mos ba iha feto maluk sira iha
Timor-Leste? Ha’u hanoin iha duni.
Iha
moris loro-loron, ita dalaruma rona no hare’e ona oinsá família, vizinhu
feto-maluk, kolega balun haktuir sira-nia
situasaun Ryan ho versaun no kontestu diferente. Relasaun ne’ebé la saudável
maibé tenke mantein, naha ekonomia ne’ebé todan, la hetan liberdade atu espressa
an no foti desizaun no problema sira seluk. Dadus husi American Psychological Association
haktuir katak persentajen feto relata sira nia estress makaas liu ho taxa 28%
kompara ho mane taxa 20%.[i]
Sita Doutor Rob Pascale no Lou Primavera iha sira nia artigu títulu Men vs.
Women and Emotional Support, ‘feto sira
presiza liu apoiu emosional mak hanesan empatia no simpatia no dalabarak tipu
apoiu hanesan ne’e mak sira hakarak duni enkuantu mane presiza atu hetan ajuda
hodi komprende no buka solusaun’.[ii]
Aleinde
ne’e, konfiansa no disponibilidade husi feto maluk mos sai kestaun wainhira belun
ida presiza apoiu iha grupu amizade. Esperensia balun husi ita-nia feto maluk
sira katak sira susar atu bele haktuir sira nia problema ba kolega sira
wainhira sira laiha no dalaruma iha mos sira laran-ruak atu konta tamba tauk
orsida nia kolega ne’e sei julga nia oioin ka konta tutan fali ba ema seluk no
ema hotu hatene nia problema. Nune’e mak nia la sente seguru atu fiar tan ema
ruma hodi haktuir ninia problema. Iha ne’e mak amizade entre grupu feto hetan
dezafiu atu bele kria espasu ida ne’ebé hamahan malu no oinsá tau komitmentu
hodi dedika tempu ba malun.
Sai
belun ba feto maluk husu ita atu komprende ita-nia feto maluk nia problema no
laos julga de’it nia maibé oinsa bele ajuda buka dalan hamutuk ajuda nia
resolve ninia problema. Ne’e dalaruma laos knar ida fasil maibé iha valor
importante loos ba ita nia amizade no belun ne’ebé presiza ita-nia tulun. Nudar
filózofu Stoiku Romanu Lucious Anaeus Seneca hateten, kualidade kmanek liu ida
husi amizade loloos mak atu kompreende no atu ema kompreende ita.
Rezolusaun
husi filme ne’e, ho ninia kolega nain-tolu ne’e nia apoiu mak Ryan konsege loke
nia an, simu ninia an ne’ebé la perfeitu no brani foti desizaun hodi hili atu hakotu
ninia relasaun ‘taka falta’ ho Steward hodi hala’o moris foun ne’ebé halo nia
sai ninia an loloos no moris nafatin fó portunidade foun ba nia maski nia
imajen muda ona nudar feto divorsiadu. Husi ne’e mak Ryan aprende atu valoriza
ninia belun diak sira ne’ebé sempre prontu atu ajuda nia ho ida-idak ninia
kualidade úniku.
Ryan
karik sorte iha netik belun diak hanesan grupu Plossy Posse. Ita feto mos
dalaruma uluk eh agora dadaun iha ita
nia grupu Flossy Posse versaun ita nian. Dalaruma ita hasoru situasaun hanesan
Ryan, taka an no bosok katak buat hotu diak de’it maibé afinal lae. Ita presiza
tulun maibé tauk atu koalia sai. Husi filme ne’e alende aprende sai hanesan
Ryan ita mos aprende atu oinsá bele sai belun diak hanesan Sasha, Lisa no Dina.
Sira ho laran moos buka simu malun ba ida-idak nia frakeza no tanen malu
nafatin ho ida-idak ninia kualidade úniku wainhira belun ida hetan susar no
selebra hamutuk wainhira sira haksolok. Dalabarak, la fasil atu ita nia belun
ida loke an ba ita, maibe se ita ne’e belun diak duni no tau aas ita nia
amizade mak ita sei buka dalan no fera ulun atu fo tulun ba ita nia belun. After all, that’s what friends are for!
Referénsia:
[i]American
Psychological Association (2018), Gender and Stress. Hasai husi: http://www.apa.org/news/press/releases/stress/2010/gender-stress.aspx
[ii]
Pascale & Primavera (2018), Men vs.
Women and Emotional Support. Hasai husi
: https://www.psychologytoday.com/us/blog/so-happy-together/201712/men-vs-women-and-emotional-support
.jpg)
Komentar
Posting Komentar