HAKSESUK-MALU HO KOLEN

Iha nakukun hakmatek kalan hau latan hela ho isin no klamar be nakonu ho moras tan tutur, leba no hiit naha ohin loron nian. Dada iis dadauk, hau senti lalatak ida mosu iha hau nia oin. Nia naran Kolen. Ami kolega diak hahu husi tempu ne'ebe hau kuinese buat ida naran 'luta ba moris'.

Uluk, wainhira hau sei bebe, hau la kuinese nia. Wainhira nia mai, hau sempre duni nia ba dook eh kesar ba ema boot hirak ne'ebe tau matan ba ha'u. Boot dadaun, ema boot hirak ne'e hanorin ha'u konaba buat ida hanaran 'hakaas'. Sira dehan ita sei la hetan aifuan diak se ita la hakaas ita nia an atu ku’u. Tenki koko maski monu bebeik, tenki koko maski naha be ita simu sei todan. Nune'e wainhira hau koko buat ida naran ‘hakaas’ mak Kolen hahu gosta mai besik no hamaluk hau. Dalaruma loron deit eh dalaruma kalan deit. To’o hau otas boot tan no simu naha be naba-naban, Kolen metin liutan ona ho hau loron kalan no susar ona atu ami husik malu.

"Kalan diak Ella. "

" Ah Kolen. O tan fali ona. O mai vizita ha'u ka goza ha'u? Hare'e took saida mak o halo ba ha'u nia isin no klamar ida ne'e. Seidauk to'o ka?"

Kolen nonook de’it hateke ha’u.

"Ella, Ella. O mak sempre fo sala ha'u de'it. Ha'u dehan ba o, se ha'u laiha, o mos sei la senti folin husi o nia luta sira. No o sei la halo mudansa ba o nia moris. O tenki hatene katak hau ezisti ona iha momentu o hahu o nia hakaas dahuluk atu luta ba o nia hakarak no mehi sira. Loloos o rasik mak tenki husu o nia an, tansá mak o tenki realiza o nia hakarak no mehi sira ne’e? Keta haluha ida ne'e!"

"Sim Kolen. O koalia loos. Maibe o nia prezensa halo hau la komfortavel, dalaruma ha'u to'o moras no sente atu mate maibe ikus mai la dauk mate de'it. Bele ka lae o eziste iha ha'u nia hakaas sira maibe la ho tortura hau nia isin no klamar hanesan baibain o halo?"

"Ella. Ne'e mak ha'u nia ezistensia nia lalaok nudar Moris-Nain hakotu ona. Ha'u eziste nudar pakote ida hamutuk ho o nia hakarak sira. Se ha'u laiha, o nia hakarak sira sei sai deit imajinasaun mamuk eh mehi be mohu lakon de'it nudar mahoween dadeersan. Ha'u iha atu halo parte husi o nia realidade moris. Marka be husik hela iha o nia isin no klamar mak hau nia maneira atu fo hanoin o Ella."

"Fo hanoin ha'u? Fo hanoin saida Kolen? Naha hirak be hau simu ne'e todan tebe-tebes ona. O hetok amenta tan deit ho o nia tortura sira? O aat ida halo nusa?"

"Ella, rona lai. Ho marka hirak ne'e mak hau fo sinal ba o, oinsá o nia hakaas ne'e sei menus ka presiza amenta, tenki repete ka halo seluk fali, tenki para ka kontinua tan. Se hau la fo sinal ba o, mak o sei lahatene atu ba loos nebé. Dalaruma o hanoin katak to'o tiha ona maibe hau haree seidauk to'o. Dalaruma o haree seidauk too, maibe hau haree to'o tiha ona. Depende o nia hakaas no o nia mehi Ella."

"Tansa tenki komplikadu nune'e Kolen? Tansa buat hotu la mosu prontu deit wainhira hau fekit liman hodi hatoo hau nia hakarak? O hatene nusa Kolen? Dalaruma o halo ha'u tanis no halerik mesa-mesak, liu-liu iha tempu ne'ebe hau sente susar tebetebes."

"Ella... O la tanis mesa-mesak. Hau mak hamaluk hela o maibe o nunka realiza ida ne'e. O hatene nusa? Atu aban bairua o sai ferik mos, ha'u mak sei akompanha o nafatin. Karik o nia destinu ikus mak sei hafahe ita nain rua. Hau sempre hamaluk o iha susar no terus nia laran. Hau mak sei fo hanoin fali o ba o nia memoria luta wainhira o haksolok. Se o murmura bebeik, o sei hakanek liutan o nia an. Laiha ema ida mak hatene o diak liu fali hau."

"Maibe ema balun dehan kolega bebeik ho o ba hau nia moris tomak sei habeik ha'u Kolen. Sira dehan hau tenki buka dalan badak atu to’o lalais hau nia mehi maski aat, sira dehan garante ba o sei la halo ha’u nia moris la’o ba oin ..."

"Keta fiar sira nia liafuan Ella. Tan sira haluha katak sira mos hamaluk an ho Kolen seluk maibe ho maneira la hanesan. Dalan badak nebe sira dehan ikus mai bele sai fali dalan ba terus naruk. Lao tuir o nia dalan loos nee. Halakan o nia lampada wainhira nakukun. Monu no hamriik ita rua sei hamutuk."

"Ha'u tauk Kolen..."

"Tauk saida Ella?"

"Ha'u tauk buat hotu saugate deit."

"Keta tauk. Wainhira o koko ho o nia kbiit tomak. O nia hakarak bele to'o. "

"Oinsa karik hau koko maibe la to'o nafatin?"

"Se nune'e fiar ba katak moris iha planu rasik ba o. Importante mak o keta rende atu aprende no apresia buat hotu nudar parte husi prosesu realizasaun planu ida ne'e."

"Nune'e ka?"

"Sim Ella. Agora toba ona. Aban iha naha barak hein hela ita."

"Kalan diak Kolen".

"Kalan diak Ella".

Nune'e haksesuk-malu ne'e remata no hau dukur iha Kolen nia hakuak be metin loos.

VZ, Dili, 16 Marsu 2016