Aprende husi Sócrates: Ta’es Dala Tolu

Sócrates mak ema matenek-nain ida husi Igregu. Nia ema ida be naran boot tamba ninia kuinesementu no sabedoria ne’ebe klean. 

Loron ida, iha mane ida mai hasoru malu ho Sócrates no hateten, 

“Itaboot hakarak hatene saida mak ha’u foin rona konaba itaboot nia belun ida?’’

“Hein lai,” Sócrates hatán.  

“Molok itaboot fo hatene ha’u konaba buat ruma, ha’u hakarak itaboot passa lai ezame kiikoan ida. Ezame ne’e hanaran Ta'es Dala Tolu. ”

“Taes Dala Tolu?” Mane ne’e husu.

“Loos,” Sócrates hatán. 

“Molok itaboot hateten mai ha'u konaba ha’u nia belun, karik diak liu fó tempu uituan hodi ta’es lai buat ne’ebé itaboot atu hateten. Ida ne’e ha’u bolu dehan ezame ta’es dala tolu.

Ta’es dahuluk nian mak LIALOOS. Itaboot garante ona katak buat ne’ebe itaboot atu hateten mai ha’u ne’e loos?"

“Lae” mane ne’e hatán, “loloos ne’e ha’u foin mak rona no hakarak atu fo hatene ba ita.”

“Diak,” Sócrates hatan. 

“Se nune’e itaboot ladauk hatene  katak ida ne’e loos ka lae.” 

“Tuir mai, ta’es daruak nian mak DI'AK. Karik buat ne’ebé itaboot atu hateten mai ha’u konaba hau nia belun ne’e buat ne’ebe mak di'ak?”

“Lae, maibe ne’e buat ne’ebe aat.”

"Se nune’e, itaboot hakarak hateten mai ha’u buat ne’ebé aat konaba nia, maibé itaboot la da’uk hatene se ida ne’e loos ka lae."

"Diak, maibé itaboot tenki passa tan lai ezame tuir mai, mak FOLIN. Karik buat ne’ebé itaboot hakarak atu hateten mai ha’u konaba ha’u nia belun ne’e sei fo folin mai ha'u?”  Sócrates husu tan.

“Lae, lae liu,” mane ne’e hatán.

“Se nune’e karik,  wainhira buat ne’ebé itaboot hakarak atu hateten mai ha’u konaba ha’u nia belun ne’e la loos, la diak, no hetok la folin ba ha’u, tansá itaboot hakarak fo hatene ida- ne'e mai ha’u? ”

~Istoria Adotadu  konaba  Sócrates