Vizita Ida iha Fulan Agosto

Fonte foto: etc.usf.edu

Lospalos, Agosto 1999.

Iha tempu ne’ebá, ha’u serbisu nudar alfaiate iha uma. Ha’u  loro-loron suku  no hadia ropa sira ne’ebe ema lori mai maibe barak liu mak suku militar Indonezia sira nia farda. Militar Indonezia sira ne’e baze iha sede besik ha’u nia uma naran Markas TNI-AD 745. Sira gosta lori sira nia ropa mai tamba sira dehan hau suku sira nia ropa metin didiak no bele hatais kleur. Alende suku no hadia ropa no farda sira, hau mos dalaruma suku rasik kalsa ho modelu ne’ebe ha’u dezenha rasik.

Suku dadauk ropa sira, Pak Tresno, papa militar Indonezia ida tesik mai iha ha’u nia suku-fatin ho nia maluk ida. Sira rua mesak  hatais farda militar loreng koor matak nakukun be makerek.

“Permisiii…” Pak Tresno tama mai hodi kumprimenta. Ha’u para suku, hamriik netik hodi simu sira tama mai mak tuur fali.

“Iya pak… silahkan masuk.”

Pak Tresno tama mai fihir ropa sira ne’ebe bou hela iha meza leten ho oin kalma no karismátiku ne’ebé hanesan obriga de’it.

“Pak Lino, bagaimana? Celana pendek untuk tim volli pesanan saya sudah selesai?” Pak Tresno husu ho lian ne’ebe arogante uituan. Semana kotuk pak Tresno hameno duni ona atu suku kalsa nudar nia husu. Ho hamnasa midar ha’u atende nafatin kliente ne’e ho espiritu alfaiate professional ida.

“Ya pak,  lima sudah selesai. Tinggal dua lagi. Ini pak..” Ha’u hatan ho konfiansa boot hodi hatudu ha’u nia rezultadu serbisu ba nia.

Ha’u hasai pakote iha plástiku metan boot ida hodi hasai kalsa badak jinastiku nian tahan lima husi hena Nagadrill koor kinur no entrega ba pak Tresno atu hare’e tuir. Pak Tresno simu, fihir no kaer fila kalsa ida-idak ba mai ho doko ulun de’it. Nia entrega fali kalsa hirak ne’e mai ha’u maibe la fó komentáriu ruma. Ha’u konsidera de’it ona katak ninia doko ulun ne’e sinal satisfeitu ho ha’u nia serbisu.

“Hampir selesai ya? Minggu ini bisa diambil?” Pak Tresno husu tan hodi hateke ha’u ho matan kroat.

“Iyah,  bisa pak.” Ha’u hatan ho doko ulun.

“Bagus. Ya sudah pak.  Kami permisi. Mari…” Pak Tresno hateten hodi hakotu ninia vizita dader ne’e.

“Iya pak. Marii…” Ha’u hatan fila. Pak Tresno la’o loos de’it no neen fihir netik fali mai.

Laiha buat ida. Karik nia ema ida jeitu seriu liu. Maski nia jeitu mak nune’e ha’u lakohi lori ba lia. Importante ha’u hala’o ha’u nia serbisu ho diak no bele hetan ha’u selun. Kontinua fali suku,  Alda ha’u nia feen tama mai ho ami nia oan Dino be foin tinan tolu kele hela iha lipa laran fihir ha’u ho oin hamnasa makili.

“Lino.. Lino .. Hehehehehehhe…”

“Nusa o hamnasa? Iha buat ruma komik?” Ha’u husu.

“Heisa komik ne’e mak ha’u mai ne’e.” Alda hatan no kontinua hamnasa.

“Nusa ne’e? Saida mak komik?”

Ha’u fihir nia ho kuriozu maibe nia kontinua hamnasa hanesan ema kili.

“Lino, o bele duni. Papa ne’e hateten atu fila ona, nusa o bolu fali nia mai?”

“Halo nusaa? Ha’u mak bolu fali nia mai? Eh…Lae ida. Ohin ha’u hau la hateten dehan haruka nia fila-fali mai. Ema atu fila ne’e nusa mak hau bolu fali nia mai?  

“Lino, o bolu duni nia atu fila mai sah. Be nia hateten dehan ‘Kami permisi. Marii..’ ne’e o envez dehan ‘silahkan’ lae o dehan fali ‘mari’ ne’e?”

“Hah? Ne’e mos loos ka.. Nia dehan ‘Permisi, marii’ be ha’u mos hatán de’it dehan ‘marii’ ne’e la loos ka?”

“Ne’ega. Ne’e la loos ka Lino. ‘Mari’ ne’e Indonesia dehan ita bolu ema atu mai. Ema despede ita ne’e ita hatan ‘Silahkan.” Alda esplika mai ha’u hanesan tiha mestra linguistika diak ida. Afinal nia konsege de’it  eskola to’o SMP kelas 1, ne’e mos la hotu tan. Enkuantu ha’u konsege deit eskola segundu klasse tempu portugues maibe mos la hotu tamba funu.

“Heisah… loos ona. Ha’u mak koalia sala. O dehan ne’e mak loos.” Ha’u hataan nia ho hamnasa mihis hateke nia oin be kontinua hamnasa maski hau rasik mos senti katak ha’u koalia loos hela.

Se ha’u hakarak ha’u bele de’it debate ho nia. Maibe tinan tolu ikus moris ho nia ne’e halo ha’u aprende katak mane bele matenek to’o iha ne’ebé mos sei lakon wainhira debate hasoru feen tan feen sira sempre hanoin katak sira mesak mak loos maski laos buat hotu ne’ebe sira defende ne’e loos. Ha’u husik hau nia an lakon ho ninia iha argumentu ida ne’e no ami hamnasa hamutuk to’o ami rona ema bolu iha kios atu hola sasan. Alda tesik ba fali kios iha sala sorin uma oin ne’e, enkuantu ha’u kontinua suku kalsa daneen ordem husi Pak Tresno.

Besik tuku sanulu resin rua hanesan ne’e,  ha’u senti kolen no hakarak tuur halimar lai uituan. Ha’u deside la’o ba hare’e manu-luhan iha uma kotuk ne’eba. To’o iha ne’eba, ha’u loke odamatan no kuartu ho luan medida 3x3 metrus ho aas metro haat nakloken no manu-aman sira be kesi iha ne’eba simu ha’u ho kokorek badak hanesan kumprimenta ha’u. Manu-luhan ne’e halo iha fulan kotuk no husi liur ema sei hare’e manu luhan ne’e hanesan fali kuartu toba ketak ida iha liur. Selly ha’u nia oan feto boot tinan sia,  bolu manu-luhan ne’e asrama orfonatu manu nian. Nia dehan nune’e tan nia hare’e iha  laran ha’u fahe espasu kuadradu hanesan fahe kuartu  ba manu-aman ida-idak nune’e mak hanesan loos asrama orfanatu padre sira nian iha igreja Lospalos villa ne’ebá. Ha’u hamnasa de’it wainhira hanoin kona ninia liafuan.

Alende suku ropa, ha’u nia passa tempu favoritu mak futu-manu. Tan ne’e ne’e mak ha’u gosta hakiak manu aman futu nian nudar koleksaun. Ha’u iha manu-aman  Bure no Djala nain sanulu. Sira ne’e ha’u taumatan hodi fo han didiak nune’e sira buras ho hirus matan kabosu no fulun  nabilan. Ba manu-aman sira ne’e, ha’u to’o sosa batar-musan no fulin  karong haat natoon hada iha laran. Hare’e tiha katak manu sira mesak kompletu no isin diak,  ha’u hakotu ha’u nia vizita no kontinua fali ho atividade kadi tara nudar passa tempu seluk ne’ebe sei relasaun ho futu manu.

Alende koleksi manu-aman, ha’u mos koleksi tara kuaze ruanulu hanesan ne’e. Tudik husi besi mihis ne’e ha’u sempre badinas atu kadi nune’e bele uza atu lori ba futu-manu. Tuur hela iha mahon sereja huun okos no anin malirin be hamout ha’u iha hakmatek kadi tara nian, ha’u rona lian ain balun hakat mai husi uma sorin mai besik liutan. Estranhu! Baibain ema nunka liu ha’u nia uma sorin arbiru. Familia sira mos wainhira mai sempre tuur iha baranda lai.

“Bondiiiiiiiiiia  maun Lino…. “

Ha’u para kadi tara, foti sa’e ulun no hateke lian ne’e nia nain. Iha mane nain rua mak mai hatais farda militar be tuan ona, hatais botas ne’ebe mos tuan, ida taka xapeu cowboy kor xokolate ida seluk fali taka sapeu boné metan no sira rua nia fuuk mesak naruk besik kanotak no nakrakat hela maski ida fali kesi hela nia fuuk ho boraisa be labarik sira baibain uza hodi halimar. Sira nain rua ne’e, ida naran Maubulak no ha’u kuinese nia desde uluk sei kaer kilat hamutuk iha ailaran iha tinan 1980 sira ne’e. Kosar-metan derepente suli tuir ha’u nia oin tan hakfodak no nakdedar ho sira nia prezensa derepente ne’e. Iha fatin ne’ebe ha’u hela, perigu tebes simu maluk sira ne’e tan militar Indonezia nia baze mos besik uma. Ha’u koko simu sira ho oin midar maibe envezde lori sira ba uma laran atu hemu bee manas ha’u dada fali sira haruka lalais kedas ba tama manu-luhan no taka metin odamatan no husik janela mak nakloke uituan.

“Maun sira… diskulfa. Ha’u la lori imi tama ba uma laran tamba iha ne’e perigu liu. Imi ohin mai intél sira dalaruma hare’e hetan ona imi. imi ba ne’ebe mak mosu fali  iha ne’e? Tansa antes mai la hateten lai ema ruma par ha’u prepara netik? Hanesan ne’e orsida ema toman ita, ita bele mate.” Ha’u hateten ho lian atu bisu-bisu sala-sala ba sira.

“Maun Lino…. Ami mos fofoun la hanoin kona atu liu iha ne’e tamba ami la hatene uma. Ami mai ho maluk sira balun iha Natura ne’ebá. Ne’e ha’u nia maluk Cipriano husi Makalaku. Ita  nia maluk ida mak konta maun ba ami no hatudu uma ne’e mak  ami mai. Aproveita ami mai ne’e, maun bele fo tuir lai buat ruma atu ami lori ba maluk sira iha ailaran.” Maubulak hatán mai ha’u ho lian maran sala-sala.

Ha’u kontinua se tilun ba uma sori-sorin karik ema ruma rona hela ami. Ha’u hateke sira lori buat ruma iha bornal metan ida.

“Imi lori saida mak ne’e maun sira?”

“Ne’e garnada maun.”

“Aipah, imi lori garnada mak la’o fali hanesan ne’e ne’e Maubulak?”

“Maun, pasiensia ha’u lori de’it ona. Par buat ruma karik ha’u reta kedas.”

“Eih Maubulak, iha ne’e perigu. Imi rua de’it tan. Mai rai diak tiha imi nia garanada iha karong batar musan ne’e nia laran ba. Tau liu ba okos.”

“Diak maun.” Maubulak hataan no nia hahu haloot garnada iha bornal ne’e subar iha karong batar musan nia laran.

“Entaun, imi presiza saida de’it maun sira?” Ha’u kontinua husu fali.

“Maun, se bele fo lai sigaru ho foos saku ida rua hanesan ne’e.” Maubulak mak hatan tan.

“Diak Maubulak, ne’e loos ona. Maibe agora, ita sai de’it hanesan ne’e ema papa sira uma sorin ne’e deskonfia kedas ita. Agora ita sai tuur iha liur, imi foti manu ne’e ita soran halimar lai.” Ha’u hateten hodi hateke metin ba Maubulak no nia maluk Cipriano.

“Nusa tenki halo hanesan ne’e maun? Maun dehan ami tuur leet iha ne’e perigu.”

“Diak hela sah Maubulak. Imi rua halo tuir deit ba..”

No sira mos doko ulun de’it hodi kore dadauk manu-aman bure mean lakan ida ho Djala mutin ida no ami sai ba liur. Husik sira hela soran halimar manu, ha’u hare’e Selly hamriik fihir ami nain tolu husi odamatan ho oin kuriozu. Ha’u fo sinal Selly atu tesik ba umalaran hein sasan kios. Alda hakbesik  mai bolu ha’u.

“Nusa ne’e?”

“Papa ohin dadeer ne’e mai fali husu ha’u konaba sira nain rua ohin mai ne’e. Nia tesik mai ona atu koalia ho imi.” Alda hateten ho oin tauk.

“Diak hela Alda. O ba fali kios ne’ebá faan sasan hanesan baibain ne’ega? Husik ha’u mak hatan. Halo jeitu hanesan laiha buat ruma akontese ne’ega? Ba ona kios ba…” Ha’u hatan ba  Alda hodi haboot nia laran tan ha’u lakohi nia tauk liu no bele monu tan dezmaia ruma.

Entretantu, ha’u fila-fali ba maluk nain rua ne’ebe soran manu namanas no hateten sira atu tama fali ba manu-luhan laran subar iha karon batar sira be hada malu ne’e nia leet. Ha’u taka metin tiha odamatan, ha’u tuur fali hodi kadi tara. Pak Tresno no nia kolega ohin dader ne’e mak mosu fali mai. Ha’u koko simu sira ho jeitu normal.

“Siang pak….” Ha’u kumprimenta sira maibe sira hateke de’it ha’u metin-metin durante segundu balun.

Ha’u nia laran taridu hela. Ha’u bele siik tansa sira mai tuir kedas maluk nain rua ohin ne’e. Ha’u tauk mak  keta halo sira hanoin ona buat aat ruma mai hau. Iha ha’u nia laran, ha’u temi dadauk ha’u nia aman no abon matebiaan sira nia naran hodi harohan husu sira nia tulun bele proteje ha’u ohin loron ne’e.

“Pak Lino… dua orang yang tadi datang itu siapa?”  Pak Tresno husu hodi fihir ha’u meti-metin. Nia kolega fihir haleu area ha’u nia uma.

Lahatene oinsa, derepente ha’u hanesan hetan resposta bisu-bisu mai ha’u nia tilun. 

“Oh mereka dua yang tadi itu teman-teman anggota Tim Saka dari Baucau pak. Mereka mampir mau lihat ayam jantan untuk adu ayam nanti sore.” Ha’u hateten ho oin kalma maski tauk nafatin dere ha’u. Keta halo sira sei la fiar ha’u nia razaun. Maski nune’e,  hau senti hanesan iha kbiit majiku ida haleu ha’u.

Pak Tresno no nia kolega hateke tiha ba malu  kleur kuaze minute ida. Hafoin sira doko ulun no hateke fali mai ha’u. 

“Ya sudah pak Lino. Kami permisi. Kalo kami curiga ada sesuatu disini, kami akan datang lagi…” Pak Tresno hateten no bolu nia kolega la’o dadauk.

Hafoin sira lakon husi ha’u nia hateke, ha’u nia laran senti kmaan fila-fali. Ha’u agradese Maromak hodi temi mos matebian sira naran dala ida tan iha neon.  Ha’u ba fali loke manu-luhan, haruka sira rua sai mai no ba tama uma-laran hodi bolu sira atu han meudia. Alda tein ona no halo modo kariil kulu zaka.  Hafoin tau  hela hahan ba ami iha meza, nia ba fali hein kios.  Meudia ne’e, ami nain tolu haan ho nonook.

Hafoin haan no tuur tiha uituan, besik tuku rua ha’u prepara an lalais hodi bolu maluk sira ne’e atu ba futu-manu iha aldeia Moto-lori. Futu-manu hahu tuku tolu maibe foin tuku rua de’it ami nain tolu prontu ona hodi la’o sai husi uma. Atu evita hasoru militar Indonezia sira hare’e hetan ami, ha’u gia sira rua la’o tuirde’it  to’os laran iha aldeia Puihoro nian. Sorte katak duut no aihoris sira toos laran e’e mesak naruk be taka netik ami husi komunidade nia hare’e. Loraik ne’e, ha’u konsege manan futu-manu ida no manan taru osan rupiah rihun limanulu. Ha’u sosa  tan manu mate husi futu-manu ne’e rua atu lori ba uma halo modo. Tuku hitu ho balun hanesan ne’e ami iha fali ona uma. Maubulak no Cipriano kalan ne’e ajuda ami tunu no tein na’an-manu no ami haan hamutuk.

Hafoin haan, ha’u lori tan sira mai iha manu luhan atu dadalia uituan  konaba segredu ida.

“Halo nusa maluk sira, maizumenus iha ailaran nia hare’e ba situasaun ohin ne’e oinsa?” Ha’u husu.

“Maun… Agora fulan ida ne’e mak ita sei vota. Malae UNAMET sira ajuda ona konaba votasaun nian maibe ami tenki matan moris no neon nain nafatin. Maun sira kalan keta haluha hadeer ho. Ba vota karik, maun hatene ona atu hili ida ne’ebe. “ Cipriano hateten.

“Sim maun, buat ida ne’e mak uluk kedas ita nia abon,maun alin sira iha ailaran fakar-ran bá, ita terus iha ailaran. Imi mak la’orai to’o  iha ne’e maibe ami hatene imi nia fuan metin nafatin. Loron besik ona maun…” Maubulak hatutan.

Ha’u rona Cipriano no Maubulak nia liafuan ho doko ulun de’it. Ha’u nonok hikas hodi hanoin kona fali oinsá tempu uluk halai ba ailaran iha  tinan 1975 ema barak mate tan tiru ho kilat no garnada husi fati-fatin, hamlaha no hamrook maibe hahán laiha, labarik sira halerik iha sori-sorin. Buat sira ne’e laos senariu furak atu hanoin tuir maibé memoria ne’e sei la lakon. Desde rona dehan UNAMET tama Timor, ha’u no Alda kalan-kalan toba la dukur. Ami tauk mak karik ami dukur tiha sei akontese fali buat ruma hanesan funu uluk nian.

Kalan ne’e ha’u ho Alda prepara kedas sasan natoon atu fo tuir ba Maubulak no nia kolega. La hatene komandante ida ne’ebe mak haruka sira mai maibe ha’u hatene katak sira presiza hela. Ha’u tau hela sigaru Surya slop rua, foos saka rua no supermi kaixa rua hodi haloot atu entrega ba Maubulak no nia kolega. Kalan ne’e ami fo kuartu ida atu sira nain rua toba netik.

Iha dadeersan tuku tolu,  hau rona Maubulak no nia kolega book an hodi hadeer husi kuartu sorin. Hau mos hadeer atu atende sira. Sira rua harús tiha,  sira hateten katak kareta mai ona atu tula sira. Ha’u akompanha sira ba estrada no kareta ida modelu mikrolete para duni iha ne’ebá ho sira nia maluk balun iha laran tiha ona. Tula tama tiha sasan,  ami  despede malu ho Maubulak no Cipriano fo obrigadu mai ha’u molok tama fali ba kareta laran. Sira nia kareta mos tesik ba mohu de’it.

Liutiha, ha’u fila ba uma-laran ho laran mamuk hateke rai hakmatek be haleu ha’u ne’e ho neon susar. Kilat tarutu hasoru malu dadauk iha diresaun area sede militar Indonezia 745 nian ba. Tama kuartu laran ha’u hakarak toba fila-fali maibe matan mak la dukur no ohin ba oin karik ha’u sei la dukur nafatin iha kalan.

Vitalia Ze,

Dili, 30 Agosto 2016

N.B: Diariu ne’e dedikasaun  espesial ba ha’u nia aman atu hanoin fila-fali ninia hospitalidade iha fulan Agosto 1999 liubá.