Haas Budu Nia Saboor

 
 
 
Haas-budu, haas mangal be ema ko’a ba pedasuk mihis hodi budu ho masin no aimanas be ledu rahun uut didiak. Loron ida ami hasoru malu iha tasi-ibun Cristo Rei iha Metiaut ne’eba. Ha’u tuur hela hateke tasi nia laloran furak wainhira has-budu ne’e hateke mai ha’u husi balde laran.
 
‘O gosta tasi ka?’ Haas-budu ne’e husu no ha’u hakfodak hateke ba mai hanoin katak se mak hasee ha’u.
 
‘O bele koalia?’ Ha’u husu fali ba nia ho oin supreza.
 
‘Sim. Ha’u bele koalia se o fiar katak ha’u bele koalia.’ Haas-budu hataan mai ha’u. Ha’u doko ulun la komprende.
 
‘Entaun, o gosta tasi ka?’ Ha’u hateke has-budu no soe matan ba fali tasi ibun . Labarik kiik-oan balun hariis tasi ho kontente. 
 
‘Sim. O bele dehan nune’e se o fiar katak ha’u gosta tasi.’ Ha’u hataan ba has-budu.
‘Ha’u fiar o gosta tasi.’ Haas-budu hataan. 
 
‘Tansa o dehan nune’e?’
 
‘Tan o hateke metin loos ba tasi-ibun hanesan imi rua ne’e ko’alia hela ba malu husi fuan ba fuan.’
Ha’u hamnasa tiha. Hafoin ami rua nonook hikas.
 
‘O halo saida iha ne’e?’ Ha’u husu fali nia.
 
‘Ha’u mai faan an.’ 
 
‘Tansa o faan an?’
 
‘Atu ha’u bele sosa lesuk modo tahan futun ida ba familia ida ho oan nain lima mesak kiik-oan.’
Ha’u hateke metin nia ho laran-dodok.
 
‘O nia sabor ne’e oinsa loos?’ Ha’u husu.
 
‘O koko tiha lai mak o sei hatene.’ Nia hataan. Ne’e hanesan sadik maibe hanesan mos fo aisasiik ba buat seluk. 
 
Ha’u foti ninia pedasuk ida hodi koko haan tanan. Ha’u taka matan senti nia saboor sona ha’u nia nanal. Hafoin ha’u foti has pedasuk ne’e kahur ho masin deit hodi haan. Nata hotu tiha, ha’u foti fali has pedasuk nia rohan ne’e tau tan ba aimanas hodi haan. To’o pedasuk rohan ikus, hau foti hodi tau ba masin no aimanas dala ida mak hodi haan. Esperimenta has pedasuk ho saboor haat ne’e fo sensasaun keta-ketak ba ha’u nia nanal no borus to’o ha’u nia noin no neon. 
 
‘Entaun, oinsa ha’u nia saboor?’ Has budu iha balde laran ne’e husu tan. 
 
‘Siin.’ Ha’u hataan. 
 
‘Loos. Ha’u hatene ha’u nia saboor siin tamba ha’u sei matak hela. Saida tan?’ 
 
‘Siin no meer.’ 
 
‘Loos. Ne’e tan o kahur ona ha’u ho masin. Masin hameer ha’u nia siin.Saida tan?’
 
‘Siin no Manas.’ 
 
‘Loos. Tamba o kahur ha’u ho ai-manas. Aimanas hamans liutan ha’u nia siin. Saida tan?’
 
Siin, meer no manas.’
 
‘Loos. Tamba o kahur tiha ha’u ho masin no aimanas. Sira rua hameer no hamanas ha’u nia siin. 
 
Agora saida mak o sente?’
 
‘Saida mak ha’u sente?’ 
 
‘Sim saida mak o sente?’
 
‘Siin, meer, manas, malirin.’
 
‘Hmmmm… entaun agora o kuinese ona ha’u?’
 
‘Karik.’
 
‘Ida ne’e mak ha’u. Ida ne’e mak moris.’
 
Ha’u hakarak atu husu tan. Maibe, labarik feto ida mai hodi hiit has-budu iha balde ne’e hodi la’o sees tiha husi ha’u tesik ba dook ne’eba hasoru loron-matan monu.

VZ, Dili, 2 Agosto 2017
Dedika espesial ba MSB, ba reuniaun furak iha Kristu Rei iha loron 9 Jullu 2017


Komentar

Posting Komentar

Postingan populer dari blog ini

Aprende husi Sócrates: Ta’es Dala Tolu

Gambar
Sócrates mak ema matenek-nain ida husi Igregu. Nia ema ida be naran boot tamba ninia kuinesementu no sabedoria ne’ebe klean.  Loron ida, iha mane ida mai hasoru malu ho Sócrates no hateten,  “Itaboot hakarak hatene saida mak ha’u foin rona konaba itaboot nia belun ida?’’ “Hein lai,” Sócrates hatán.   “Molok itaboot fo hatene ha’u konaba buat ruma, ha’u hakarak itaboot passa lai ezame kiikoan ida. Ezame ne’e hanaran Ta'es Dala Tolu. ” “Taes Dala Tolu?” Mane ne’e husu. “Loos,” Sócrates hatán.  “Molok itaboot hateten mai ha'u konaba ha’u nia belun, karik diak liu fó tempu uituan hodi ta’es lai buat ne’ebé itaboot atu hateten. Ida ne’e ha’u bolu dehan ezame ta’es dala tolu. Ta’es dahuluk nian mak LIALOOS . Itaboot garante ona katak buat ne’ebe itaboot atu hateten mai ha’u ne’e loos?" “Lae” mane ne’e hatán, “loloos ne’e ha’u foin mak rona no hakarak atu fo hatene ba ita.” “Diak,” Sócrates hatan.  “Se nune’e
Baca selengkapnya

Domin no Diferensa

Gambar
Wainhira sei eskola, ha’u iha belun mane no feto ida ne’ebe laran monu ba malu no hahu sira nia relasaun domin iha tinan dahuluk eskola nian. Maski   nune’e, sira nia relasaun   hasoru diferensa iha ida-idak nia tinan, hahalok no hanoin hodi halo sira dalaruma hirus malu no kuaze atu fahe malu. Belun feto ne’e dalaruma senti laran nakraik nune’e iha tempu ruma nia fahe nia sentimentu ba ha’u nomos belun feto maluk seluk ne’ebe nia konfia atu hato’o nia problema.  Iha kalan ida, ha’u mehi   konaba nia no nia doben. Iha loron tuir mai, ha’u hasoru belun feto ne’e, ha’u haree katak nia la duun kontente tan ninia problema no sintimentu sira.  Ha’u konta tuir ba nia oinsa ha’u mehi haree nia no nia doben hirus malu makaas to ’o nia tanis senti la bele hodi sai konfuzaun lahatene atu halo oinsa loos. Iha mehi ha’u hakbesik nia hodi dehan: ‘’Belun, iha mundu ne’e, laiha mane ne’ebe perfeitu maibe sei iha domin ne’ebe perfeitu….”. Ha’u ho ha’u nia belun sai bilaan ba momentu
Baca selengkapnya

Feto no Lideransa: Wainhira Feto Ida Sai Lider

Gambar
“As women, we must stand up for ourselves. We must stand up for each other. We must stand up for justice for all.” – Michelle Obama Sa mak ita no  ema barak hanoin kona wainhira rona no hare'e feto ida sai lider ka ema-boot? Konserteza sei iha responde no komentariu oioin ba hahusuk ida ne'e. Desde tempu antigu to'o tempu modernu ohin loron nian, iha ona figura lideransa feto barak ne'ebe naran boot iha mundu hanesan Cleopatra, Hatsheptshut, Rainha Elizabeth, Benazir Butho, Angela Merkel, Margaret Tatcher, Indira Gandhi, Gloria Macapagal Arroyo no sira seluk tan ne'ebe marka ona sira nia an ba mundu katak feto iha kapasidade atu kaer lideransa ida. Lideransa iha kontestu ida ne'e refere ba area oioin hanesan politika, sosial, relijiaun, negosiu no selu-seluk tan. Koalia konaba lideransa, iha stigma jeral ida husi sosiedade hodi hanoin katak so mane de'it mak bele kaer lideransa. Stetmentu afirmativa ida ne'e afinal sai ona fallasia (hanoin la-lo
Baca selengkapnya